Մարտի 21-ը դաունի համախտանիշի համաշխարհային օրն է: Աշխարհի բազմաթիվ երկրների թվում Վրաստանում ևս միջոցառումներ են իրականցվում:
Դաունի համախտանիշով ապրող մարդկանց խնդիրները բարձրաձայնելու նպատակով կազմակերպվել է «Իմ ձայնը հանրության մեջ» խորագրով քարոզարշավը:
Մարտի 20-ին Վրաստանի նախագահ Գիորգի Մարգվելաշվիլին և առաջին տիկին Մակա Չիչուան նախագահի նստավայրում հյուրընկալել են դաունի համախտանիշ ունեցողներ մի խումբ քաղաքացիների հետ, միասին շրջել նստավայրում
։ Նախագահը դաունի համախտանիշով երիտասարդներին տեղեկացրել է սեփական իրավունքների մասին, նրանց նվիրել 
Վրաստանի սահմանադրությունն ու գրքի վաուչերներ:
Տեսանյութը կարող եք դիտել ՝ այստեղ
Օրվա առիթով հայտարարություն է տարածել նաեւ Վրաստանի խորհրդարանի խոսնակ Իրակլի Կոբախիձեն. «Այս օրը մեզ հիշեցնում է, որ մեր կողքին ապրում են մարդիկ, որոնք մեր հասարակության լիարժեք անդամներն են: Նրանք ներուժ ունեն, որը կարող են ծառայեցնել երկրի ամենատարբեր ոլորտների զարգացման համար: Մեր առաքելությունն է նպաստել դաունի համախտանիշով մարդկանց հավասար ներգրավվածությանը՝ ապահովելով կյանքի տարբեր ոլորտներում նրանց մասնակցությունը»:
Մարտի 21-ը պատահական չի ընտրվել։ 21-րդ ավելորդ քրոմոսոմն է, որ առաջացնում է այս համախտանիշը։ Աշխարհում ամեն տարի դաունի համախտանիշով հազարավոր երեխաներ են ծնվում։ Այս համախտանիշով ապրող մարդկանց խնդիրները բարձրաձայնելու նպատակով ՄԱԿ-ի նախաձեռնությամբ 2012 թվականից մարտի 21-ին ողջ աշխարհում նշվում է դաունի համախտանիշի օրը:
