Բակուրիանիի հանգստավայրում պետական հողերի բռնագրավման և անօրինական շինարարության գործով հետաքննության շրջանակներում ձերբակալվել է խոշոր շինարարական ընկերության՝ «Քրիստալ Գրուպ»-ի ղեկավարը։ Այս տեղեկությունը հայտնել է Վրաստանի ֆինանսների նախարարության քննչական ծառայությունը։
Ծառայության հաղորդմամբ՝ մեղադրյալի ընկերությունը Բակուրիանիում (Դիդվելիի շրջան) առանց թույլտվության կառուցել է հինգ հյուրանոց։
Ավելին, ընկերությունն անօրինական կառուցել է մասնավոր ճոպանուղի, դահուկային լանջ և սահադաշտ, որոնց օգտագործումը հասանելի է եղել միայն «Քրիստալ Գրուպ»-ի հաճախորդներին։
TV Pirveli-ի տվյալներով՝ ձերբակալվածը գործարար Վլադիմիր Ստեփանյանն է։ Նա համարվում է իշխող «Վրացական երազանք» կուսակցության խոշոր դոնոր։ Բաց աղբյուրների համաձայն՝ Ստեփանյանը 2021 թվականի խորհրդարանական ընտրություններից առաջ «Վրացական երազանք» կուսակցությանը նվիրաբերել է 50 հազար լարի:
«Առանց թույլտվության կառուցված հյուրանոցների վաճառքը հանգեցրել է մի քանի միլիոն լարիի չափով անօրինական եկամուտների։ Այս փուլում հետաքննությունը հաստատել է 1 միլիոն 894 հազար 925 լարիի չափով անօրինական եկամուտների լվացում», — ասել է քննիչ Իա Ախալաիան։
Նրա խոսքով՝ գործակալությունը շարունակում է հետաքննել «Քրիստալ Գրուպ»-ի գործունեությունը, նաև պարզում է հանցագործությանը ներգրավված անձանց, այդ թվում՝ պետական պաշտոնյաների։
Հետաքննությունն ընթանում է անօրինական ձեռնարկատիրական գործունեության, խոշոր հարկերից խուսափելու և փողերի լվացման ուղղությամբ։ Նշված հանցագործությունները պատժվում են 9-ից 12 տարի ազատազրկմամբ։
