Վրաստանի էկոնոմիկայի և կայուն զարգացման նախարար Մարիամ Քվրիվիշվիլին հանդիպել է Ադրբեջանի Հանրապետության էներգետիկայի նախարարին։ Փարվիզ Շահբազովը, պատվիրակության հետ միասին, աշխատանքային այցով գտնվում է Թբիլիսիում՝ Վրաստանում անցկացվող «Կանաչ էներգիայի մալուխ» նախարարական հանդիպման շրջանակներում։
Էկոնոմիկայի նախարարության հաղորդմամբ՝ կողմերը քննարկել են երկու երկրների միջև էներգետիկ համագործակցության առաջնահերթ ոլորտները, այդ թվում՝ «Հարավային Կովկասի էներգետիկ համակարգը եվրոպական ցանցի հետ կապող էներգետիկ մալուխի ֆլագմանական նախագծի իրականացման հետ կապված կարևոր հարցեր»։
Նախարարները ևս մեկ անգամ ընդգծել են նախագծի ռազմավարական նշանակությունը, որը կնպաստի վերականգնվող էներգիայի ոլորտի զարգացմանը և կբարձրացնի Եվրամիության ու Հարավային Կովկասի տարածաշրջանի միջև տարանցիկ և երկկողմ առևտրային հնարավորությունները։
«Հանդիպման ժամանակ ընդգծվել է, որ երկու բարեկամ երկրներն ակտիվորեն շարունակում են իրենց գործընկերությունը՝ էներգետիկ անվտանգության, տարածաշրջանային ինտեգրման և կայուն զարգացման ընդհանուր նպատակներին հասնելու համար», — ասված է Էկոնոմիկայի նախարարության մամուլի հաղորդագրության մեջ։
Զրույցի ընթացքում անդրադարձ է եղել նաև երկու երկրների միջև էներգետիկ ենթակառուցվածքների ու հիդրոէներգետիկ ռեսուրսների զարգացմանը և նավթի ու գազի ոլորտներում համագործակցության հետագա ամրապնդմանը։
