Վրաստանի «Առաջին ալիք»-ի (Հանրային հեռուստատեսություն) նախկին հաղորդավարներ Նինո Զաուտաշվիլին և Վասիլ Իվանով-Չիքովանին դատական ​​հայց են ներկայացրել հեռուստաընկերության դեմ Թբիլիսիի քաղաքային դատարան։

Նախկին հաղորդավարները բողոքարկում են գլխավոր տնօրեն Թինաթին Բերձենիշվիլիի՝ իրենց պայմանագրերը խզելու որոշումը։ Նրանք հույս ունեն, որ գործընթացը պետք է ավարտվի իրենց հաղթանակով:

Նինո Զաուտաշվիլին և նրա թիմը «Իրական տարածք» (Ռեալուրի սիվրցե) հաղորդաշարից, նաև Վասիլ Իվանով-Չիքովանին և հեռուստատեսության մի քանի այլ աշխատակիցներ վերջերս հաճախ են բարձրաձայնում Հանրայինի աշխատանքի թերությունների մասին։ Հանրայինի ղեկավարությունը կարծում է, որ դա անելով՝ նրանք խախտել են պայմանագրի պայմանները։

Հանրայինի գլխավոր տնօրեն Թինաթին Բերձենիշվիլիի որոշմամբ՝ Զաուտաշվիլիի և Իվանով-Չիքովանիի պայմանագրերը խզվել են ապրիլի 11-ին։ Նույն օրը կարգապահական տույժեր են կիրառվել չորս աշխատակիցների նկատմամբ՝ «Իրական տարածք» հաղորդման թղթակից Թամար Մշվենիերաձեի, նույն հաղորդման հաղորդավար Իոսեբ Կացիտաձեի, հեռակառավարման տնօրեն և համակցված սպորտային ալիքի տնօրեն Կախաբեր Մելիքիձեի և բրենդինգի ու առաջխաղացման խմբի տնօրեն Իրմա Չուբինիձեի նկատմամբ։

Մի քանի օր անց՝ ապրիլի 17-ին, նմանատիպ նախազգուշացում ստացան «Իրական տարածք»-ի խմբագիր Տուխա Կվինիկաձեն, «Շաբաթ-կիրակիի շոու»-ի գործադիր պրոդյուսեր Թամար Ճինճարաուլին, նույն ծրագրի թղթակից Անա Աբակելիան և խմբագիր-օպերատոր Գիվի (Գիգա) Կիտիան։

Այն ժամանակ, երբ Հանրայինը խոսում է իր խմբագրական քաղաքականության քննադատության հետևանքով «հեղինակությանը հասցված վնասի» մասին, Գիորգի Գվիմրաձեն, որ անցյալ տարվա նոյեմբերի 30-ին վիրավորել էր մի քաղաքացու, դեռևս Հանրայինի հոգաբարձուների խորհրդի նախագահ Վասիլ Մաղլափերիձեի հետ համատեղ վարում է ՀԸ-ի «41-րդ զուգահեռ» փոդքասթը։