«Վրացական երազանք»-ի ստեղծած ժամանակավոր քննչական հանձնաժողովի քննարկմանը չներկայանալու համար Թբիլիսիի քաղաքային դատարանն ընդդիմադիր «Կոալիցիա փոփոխությունների համար»-ի առաջնորդներից Նիկա Գվարամիայի նկատմամբ խափանման միջոց է սահմանել 30 հազար լարի գրավը: Դատավոր Էկա Բարբակաձեն ամբողջությամբ բավարարել է դատախազի միջնորդությունը։
Գվարամիային հրավիրել են վիճելի խորհրդարանում գտնվող ժամանակավոր քննչական հանձնաժողով, որը նախագահում է Թեա Ծուլուկիանին, սակայն Գվարամիան հրաժարվել էր ներկայանալ։ Հանձնաժողովը Գվարամիայից բացատրություն է պահանջել 2004-2012 թվականներին Վրաստանում պաշտպանության, անվտանգության և մարդու իրավունքների պաշտպանության ոլորտներում տիրող իրավիճակի վերաբերյալ։
Գվարամիայի դեմ գործ է հարուցվել Քրեական օրենսգրքի 349-րդ հոդվածով՝ «Վրաստանի խորհրդարանի ժամանակավոր քննչական հանձնաժողովի օրինական պահանջը չկատարելը», որը պատժվում է տուգանքով կամ ազատազրկմամբ՝ առավելագույնը մեկ տարի ժամկետով, կամ պաշտոն զբաղեցնելու կամ գործունեությամբ զբաղվելու իրավունքից զրկելով՝ առավելագույնը երեք տարի ժամկետով։
Գվարամիան դատական նիստին ներկա էր «պոպկորնով». դատավորը նրան կարգի է հրավիրել դատական նիստի ժամանակ, ինչին ի պատասխան Գվարամիան պատասխանել է, որ «շաքարային դիաբետ ունի ու ստիպված է դա ուտել»։ Սրա պատճառով դատավորը ընդմիջում է հայտարարել։
Ընդմիջումից հետո դատարանը լսել է դատախազի միջնորդությունը, ըստ որի՝ «առկա է եղել փախուստի և կրկնակի հանցագործություն կատարելու վտանգ»։ Գվարամիան նիստում խոսել է «մեղադրանքների անհեթեթության» և «հանձնաժողովի լեգիտիմ չլինելու մասին»։
Գվարամիան ասել է, որ գրավի վճարման վերաբերյալ որոշում կկայացնի թիմի հետ խորհրդակցելուց հետո։
Հանձնաժողովը նիստին հրավիրում է ընդդիմության առաջնորդներին՝ ինչպես «Միացյալ ազգային շարժման» նախկին բարձրաստիճան պաշտոնյաներին, այնպես էլ ընդդիմադիր այլ գործիչների։ Նիստին չներկայանալու համար արդեն իսկ մեղադրանք է առաջադրվել և խափանման միջոց գրավ է կիրառվել Մամուկա Խազարաձեի և Բադրի Ջափարիձեի («Ուժեղ Վրաստան» կուսակցություն) նկատմամբ` յուրաքանչյուրին 50 հազարական լարի գրավ։ «Միացյալ ազգային շարժման» կառավարության տարիներին պաշտպանության, ներքին գործերի և էկոնոմիկայի նախարար Իրակլի Օքրուաշվիլիի նկատմամբ սահմանվել է 20 հազար լարի գրավ, և նրան արգելվել է լքել երկիրը, «Կոալիցիա փոփոխությունների համար»-ի առաջնորդներից Զուրա Ջափարիձեի նկատմամբ՝ 20 հազար լարի, իսկ Գիվի Թարգամաձեի նկատմամբ` 10 հազար լարի:
Հանձնաժողովի մասին
ՄԱՇ-ի իշխանավարման ժամանակահատվածն ուսումնասիրող հանձնաժողով ստեղծելու մասին «Վրացական երազանք»-ը խոսեց 2025 թվականի հունվարի 9-ին։ Կուսակցության առաջնորդներից Մամուկա Մդինարաձեի խոսքով, հանձնաժողովը կուսումնասիրի.
- բանտերում բանտարկյալների նկատմամբ խոշտանգումների դեպքեր,
- սպանության, բռնության և անձնական կյանքի ներխուժման դեպքեր,
- կոռուպցիա և ճնշում բիզնեսի վրա, լրատվամիջոցների յուրացում,
- 2008 թվականի օգոստոսյան պատերազմի «մեկնարկի ճանաչում» և «ռազմական հանցագործությունների համար վրաց զինվորականներին մեղադրելը»,
- Մդինարաձեն նշել է, որ «2008 թվականի պատերազմի գործի հետաքննության թիրախները չեն լինելու ռազմական հրամանատարներն ու զինվորները»։
Հանձնաժողովը ստեղծվել է փետրվարի 5-ին՝ եռամսյա ժամկետով, որին աջակցել են «Վրացական երազանք»-ի 83 ներկայացուցիչներ։
Հանձնաժողովում աշխատում է ութ մարդ.
- «Վրացական երազանք»-ից՝ Թեա Ծուլուկիանին, Թենգիզ Շարմանաշվիլին, Ալեքսանդրե Տաբատաձեն, Ալուդա Ղուդուշաուրին, Պաատա Սալիան,
- Ընդդիմության քվոտան կվերցնեն «Վրացական երազանք»-ից անջատված, բայց նրա արբանյակ և կեղծ ընդդիմություն հանդիսացող «Ժողովրդի ուժ»-ից Սոզար Սուբարին, Գուրամ Մաճարաշվիլին և «Եվրոպական սոցիալիստներ»-ից Իլիա Ինջիան։
ՄԱՇ-ի գործունեության արգելումն ու կուսակցության համար «խիստ քաղաքական ու իրավական վճռի» կայացումը «Վրացական երազանք»-ի նախընտրական խոստումն էր, որի համար կուսակցությունը մտադիր էր խորհրդարան մտնել սահմանադրական մեծամասնությամբ, ինչը չհաջողվեց:
Մարտի 27-ին «Վրացական երազանք»-ն ընդլայնեց հանձնաժողովի լիազորությունները, և վերջինս այլևս չսահմանափակվեց ՄԱՇ-ի խնդրի քննարկմամբ։ Որոշվեց, որ հանձնաժողովն ուսումնասիրելու է մինչև 2024 թվականը ներառյալ իրադարձությունները:
