Վրաստանի պետական անվտանգության ծառայության (ՊԱԾ) նորանշանակ ղեկավար Մամուկա Մդինարաձեն հանդիպել է Մարդու իրավունքների պաշտպան, օմբուդսմեն Լևան Իոսելիանիին։

ՊԱԾ-ի տեղեկացմամբ՝ Մամուկա Մդինարաձեն օմբուդսմենին ներկայացրել է Պետական ​​անվտանգության ծառայության առաջնահերթությունները։ Քննարկվել են մարդու իրավունքների պաշտպանության և անվտանգության հետ կապված մի շարք հարցեր։

Հանդիպման ընթացքում կողմերն անդրադարձել են Վրաստանի օկուպացված տարածքներում և օկուպացիոն գծի երկայնքով ստեղծված իրավիճակին։ Մդինարաձեն և Իոսելիանին կարևորել են փոխադարձ համագործակցության ամրապնդումը և ապագա ծրագրերի համատեղ իրականացումը։

Լևան Իոսելիանին շնորհավորել է Մամուկա Մդինարաձեին ՊԱԾ ղեկավարի պաշտոնում ընտրվելու կապակցությամբ և նրան հաջողություն մաղթել հետագա գործունեության մեջ։