Վրաստանի ֆինանսների նախարարության գանձապետարանը հրապարակել է 2025 թվականի բյուջեի կատարողականի մանրամասն հաշվետվությունը, ըստ որի՝ անցյալ տարվա ընթացքում ծխախոտային արտադրանքից բյուջե մուտքագրված գումարն աճել է ավելի քան 222 միլիոն լարիով և հասել 1,47 միլիարդ լարիի։

Միաժամանակ, Եկամուտների ծառայության տվյալներով, տրամադրված ակցիզային դրոշմանիշերի քանակն աճել է 19,5%-ով և հասել 425 միլիոնի։ Համապատասխանաբար, մեկ տուփից բյուջե մուտքագրված միջին ակցիզային եկամուտը անցյալ տարի կազմել է 3,47 լարի։

Եկամուտների ծառայության համաձայն՝ ներմուծված արտադրանքի համար տրամադրված ակցիզների քանակը կազմել է 395 միլիոն (աճը՝ 20%), իսկ տեղական արտադրանքի համար տրամադրված դրոշմանիշերի քանակը՝ 30 միլիոն, ինչը տարեկան կտրվածքով աճել է 17%-ով։

Ծխախոտի ակցիզային եկամուտների մեջ առաջին տեղը զբաղեցնում է ադվալորային հարկը, որը, 2025 թվականին գործող օրենսդրության համաձայն, կազմում էր արտադրանքի վաճառքի գնի 30%-ը։

2026 թվականից ծխախոտի հարկման կարգը փոխվել է. ներմուծվող ապրանքների հաստատագրված ակցիզը մեկ տուփի համար 1,9 լարիից բարձրացել է մինչև 2,75 լարի, իսկ ադվալորային հարկը 30%-ից նվազել է մինչև 20%։