«Ազատության հրապարակ» կուսակցության առաջնորդներից մեկի՝ Ազգային ուսումնական պլանների և գնահատման կենտրոնի նախկին տնօրեն Սիմոն Ջանաշիայի խոսքով՝ Թատրոնի և կինոյի համալսարանը, Արվեստի ակադեմիան և Կոնսերվատորիան արդեն մշակույթի նախարարությունից ստացել են դասախոսների թիվը կրճատելու հրահանգ։
«Արվեստի համալսարանների՝ թատրոնի, արվեստի և կոնսերվատորիայի պրոֆեսորները ասում են, որ իրենց հաստատություններն արդեն ստացել են հրահանգներ մշակույթի նախարարությունից, որ դասախոսների թիվը պետք է կրճատվի. օրինակ՝ եթե ներկայումս որևէ ուղղությամբ կա 4 պրոֆեսոր, ապա պետք է կրճատվի մինչև 1 մարդ։ Այսինքն՝ մնացած 3 պրոֆեսորները պետք է կամ ազատվեն աշխատանքից կամ նրանց պաշտոնը իջեցվի։
Պատկերացրեք, մշակույթի նախարարության նշանակած հանձնաժողովը պետք է ընտրի, օրինակ, թե ով պետք է ճարտարապետություն դասավանդի Արվեստի ակադեմիայում։ Ի՞նչ հիմքերով պետք է ընտրվի այդ անձը, բացի քաղաքական հավատարմությունից», — ասել է Ջանաշիան «Ֆորմուլա»-ի հետ զրույցում։
Այս տեղեկության մասին խոսել է նաև կոնսերվատորիայի դասախոս Նինո Ժվանիան։
«Մասնագիտական համալսարանների վարչակազմերին արդեն հրահանգել են կրճատել աշխատակազմի գրաֆիկը. սրա մասին խոսում են մեր համալսարաններում։ Սակայն դեռևս ոչ ոք չի հաստատել դա։ Ես ակադեմիական անձնակազմի սովորական ներկայացուցիչ եմ, և մեզ դեռևս պաշտոնապես չեն տեղեկացրել դրա մասին։ Սրա հիմնական նպատակն է ազատել այս տարածքները քննադատաբար և անկախ մտածողությամբ պրոֆեսորներից ու ուսուցիչներից», — ասել է Ժվանիան։
Հիշեցնենք, «Վրացական երազանք»-ի խորհրդարանը կրթական համակարգի բարեփոխումների մասին օրենքի նախագիծ է ընդունել 2025 թվականի դեկտեմբերի 10-ին։
Կրթության բարեփոխումների մասին օրինագիծն ընդունվեց առաջին ընթերցմամբ
