Վրաստանում ԵՄ դեսպան Պավել Հերչինսկիի հայտարարության համաձայն՝ հունիսի 23-ին ԵՄ արտաքին գործերի նախարարները կքննարկեն Վրաստանում տեղի ունեցող իրադարձությունները։
Պավել Հերչինսկին նշել է, որ նախարարները, հավանաբար, կքննարկեն Եվրամիության դեմ ուղղված ապատեղեկատվության, պատժամիջոցների կիրառման հնարավորության և առանց վիզայի ճանապարհորդության հարցերը։
«Երկուշաբթի՝ հունիսի 23-ին, կկայանա ԵՄ արտաքին գործերի նախարարների հանդիպումը։ Սա նրանց ամենամսյա Արտաքին գործերի խորհրդի նիստն է։ Նրանք կքննարկեն Վրաստանում տեղի ունեցող զարգացումները։ Ես հստակ չգիտեմ, թե ինչ կքննարկվի, բայց ավելի ցածր մակարդակով՝ դեսպանների մակարդակով կայացած նախապատրաստական բանակցությունների հիման վրա կարող եմ ասել, որ անդամ պետությունները կքննարկեն երեք հիմնական հարց։
Առաջին խնդիրը Եվրամիության դեմ ուղղված զանգվածային ապատեղեկատվությունն է, Եվրամիության դիվայնացումը, որն իրականացվում է երկրի բարձրագույն իշխանության ներկայացուցիչների կողմից։ Երկրորդ հարցը մարդու իրավունքների խախտումների համար պատժամիջոցներ կիրառելու հնարավորությունն է, իսկ երրորդը՝ Վրաստանի քաղաքացիների համար անվիզա ռեժիմի հարցը՝ մարդու իրավունքների իրավիճակի լուրջ վատթարացման պայմաններում», — լրագրողներին հայտնել է դեսպանը։
