Բեթղեհեմի Փրկչի Ծննդյան տաճարի հոգևոր առաջնորդ Դորոթե Կղուրաշվիլին հրապարակել է բաց նամակ, ըստ որի` դա իր ուղերձն է մշակութային մարդկությանը, Եվրամիության երկրներին և Ամերիկայի Միացյալ Նահանգներին։
Նա խնդրել է նրանց օգնությունը, «որպեսզի Վրաստանն ազատվի ռուսական ագրեսիայից և վերադառնա ժողովրդավարական զարգացմանը»։
«Ես՝ որպես քահանա և ժողովրդի առաջնորդ, չեմ կարող հանգիստ դիտել մեր բնիկ ժողովրդի ճնշումներն ու խոշտանգումները, ուստի դիմում եմ ձեզ` մշակութային մարդկությանը, ժողովրդավարության շեմին կանգնած պետություններին։
Իմ հայրենիքը՝ Վրաստանը, դարեր շարունակ ապրել է Ռուսաստանի խիստ բռնապետության և անտանելի ճնշման պայմաններում։ Ռուսական պետությունը մշտապես իրեն համարում է մեր տերը, նրա համար կարևոր չէ՝ համաշխարհային հանրությունը մեզ անկախ պետություն է համարում, թե ոչ։
Մեր կառավարությունը, որին աջակցում է Ռուսաստանը, և որը Ռուսաստանի լիազոր ներկայացուցիչն է Վրաստանում, անընդհատ վրաց ազգին և համաշխարհային հանրությանը պնդում է, որ պաշտպանում է Վրաստանի պետականությունն ու ինքնիշխանությունը արտաքին ուժերից, բայց խնդիրն այն է, որ մշակութային քաղաքակիրթ աշխարհին՝ Եվրոպային, Եվրամիությանը և Ամերիկայի Միացյալ Նահանգներին համարում է արտաքին ուժեր»,- գրել է հոգևոր առաջնորդը։
Նրա խոսքով՝ ժողովրդավարությունը ոչնչացվել է, ընտրությունները, արդարադատությունը և դատական համակարգը վերացվել են, և ստեղծվել է օրենք, որը ոչ մի կապ չունի արդարադատության հետ։
«Ճիշտ է, նրանք փորձում են համոզել բոլորին՝ թե՛ հայրենիքում, թե՛ դրսում, որ ազատագրել և երջանիկ են դարձրել Վրաստանի ժողովրդին, բայց թե որքան երջանիկ է զգում վրաց ժողովուրդը, ամենից լավ գիտեմ ես՝ նրա հոգևոր հայրը և այսօրվա միակ ճշմարիտ ուսուցիչը, որի ձեռքերում են այս ազգի սրտից բխող խորհրդավոր թելերը, և որն անմիջականորեն լսում է նրա հառաչանքներն ու վշտերը»։
Քահանայի խոսքով՝ Ռուսաստանը՝ «Վրացական երազանք»-ի օգնությամբ, վրաց ազգին տանում է դեպի ֆիզիկական, մշակութային և հոգևոր ոչնչացում, և բողոքը շարունակվում է անդադար, բայց բազմիցս անողոքաբար ճնշվել է։
«Խնդրում ենք պատրաստակամ լինել և օգնել մեզ ձեզ համար հնարավոր բոլոր միջոցներով, որպեսզի Վրաստանը ազատագրվի ռուսական ագրեսիայից և վերադառնա ժողովրդավարական զարգացմանը։
Դորոթե վարդապետը (Կղուրաշվիլի) աղոթում է ձեզ համար և բոլոր արդար մարդկանց համար»,- գրել է Բեթղեհեմի Փրկչի Ծննդյան տաճարի հոգևոր առաջնորդը։
