2025 թվականին Վրաստանում վճարվել է ընդհանուր առմամբ 32.8 միլիարդ լարի աշխատավարձ` ըստ Եկամուտների ծառայության վիճակագրության:
Աշխատավարձ է ստացել ընդհանուր առմամբ 1 մլն 258 հազար 6 մարդ, նրանց թվում՝ Վրաստանում աշխատող ինչպես վրացի, այնպես էլ օտարերկրյա քաղաքացիներ։
Աշխատավարձերի ծավալը 2025 թվականին աճել է 3.7 միլիարդ լարիով կամ 13%-ով, իսկ աշխատավարձ ստացողների թիվն աճել է 4398-ով կամ 0.4%-ով։
Ստացված ամսական միջին աշխատավարձը կազմել է 1,738 լարի։ Այս ցուցանիշը տարեկան աճել է 192 լարիով։
Աշխատավարձ ստացողների թվի ցածր աճը, ըստ վարկածների, կարող է կապված լինել Վրաստանից Ռուսաստանի քաղաքացիների արտագաղթի հետ, քանի որ հազարավոր ներգաղթյալներ լքել են երկիրը, և, համապատասխանաբար, նրանց բաժինն ընդհանուր զբաղվածության մեջ նվազել է, սակայն տեղի քաղաքացիների զբաղվածության մակարդակն աճել է։
Երկրում ստացված 32.8 միլիարդ լարի աշխատավարձի մեջ չեն մտնում եկամուտների մի շարք կատեգորիաներ, որոնք գրանցված չեն Եկամուտների ծառայությունում:
Օրինակ՝ դաստիարակների ստացած եկամուտները, տների վերանորոգմամբ զբաղվող անձանց եկամուտները (չգրանցված), նաև սննդի էլեկտրոնային առաքման կամ տաքսիների կանչման համակարգերի միջոցով աշխատող հազարավոր մարդկանց եկամուտները:
Ընդհանուր առմամբ, 32.8 միլիարդ լարի աշխատավարձի եկամուտներից 6.6 միլիարդ լարին բյուջե է մուտքագրվել որպես եկամտային հարկ:
