Այսօր՝ մայիսի 19-ին, Մարդու իրավունքների եվրոպական դատարանը հրապարակել է իր որոշումը «Միլաձեն ընդդեմ Վրաստանի» գործով։
Խոսքը վերաբերում է քաղաքացի Իրակլի Միլաձեին, որը 2022 թվականին տուգանվել էր սոցիալական ցանցում տեղադրված տեսանյութում անպարկեշտ արտահայտություններ օգտագործելու համար։ Միլաձեն քննադատել է Թբիլիսիի տրանսպորտային քաղաքականությունը TikTok-ում և անպարկեշտ արտահայտություններ է օգտագործել Թբիլիսիի քաղաքապետի, նաև քաղաքապետարանի աշխատակիցների ու ոստիկանների հասցեին։ Դրա համար նա տուգանվել է 500 լարիի չափով։ Ներքին գործերի նախարարության պնդմամբ` Միլաձեի արարքն ընկնում է Վարչական իրավախախտումների օրենսգրքի 166-րդ հոդվածի տակ, որը վերաբերում է մանր խուլիգանությանը, այդ թվում՝ հրապարակային հայհոյանքներին։ Նշենք, որ քաղաքային դատարանը Միլաձեին տուգանեց 2000 լարիի չափով, սակայն վերաքննիչ դատարանը հետագայում այդ գումարը կրճատեց մինչև 500 լարի։
Ստրասբուրգի դատարանը, գործը վերանայելուց հետո որոշել է, որ Միլաձեի նկատմամբ չի խախտվել Մարդու իրավունքների եվրոպական կոնվենցիայի՝ խոսքի ազատության վերաբերյալ 10-րդ հոդվածը։
Ստրասբուրգի դատարանի որոշման համաձայն՝ Միլաձեի հայտարարությունը չէր կարող պաշտպանվել խոսքի ազատության իրավունքով, քանի որ նա չէր խոսում հանրային քննարկման համատեքստում: Պարզ ասած, այս որոշման համաձայն՝ Միլաձեի խոսքերը անձնական վիրավորանք էին, այլ ոչ թե քաղաքական քննադատություն: Դատարանը նաև հաստատել է, որ «տուգանքները» ներառում են նաև հասարակության մեջ ժողովրդականություն վայելող առցանց հարթակները: Դատարանը կենտրոնացել է պատժի համաչափության վրա և նշել, որ տուգանքը չի կարող Միլաձեին հետ պահել հետագա քաղաքացիական կամ քաղաքական գործունեությունից:
