Վրաստանյան «Սիրցխվիլիա» («Ամոթ է») քաղաքացիական շարժման հիմնադիրներից մեկի՝ ակտիվիստ Մարիամ Բաջելիձեի բնակարանի խուզարկությունն ավարտվել է. առգրավվել են նրա բջջային հեռախոսը և բնակարանում գտնվող այլ էլեկտրոնային սարքեր։
«Նրանք ինձ ասացին, որ հարևաններ են։ Ես նայեցի, և այնտեղ չորս մարդ կար, տեսա նաև անվտանգության տեսախցիկը… Ես կրկին հարցրի, թե ովքեր են նրանք, և նրանք պատասխանեցին, որ դատախազության աշխատակիցներ են… Հեռախոսը խլելուն պես իրավիճակը հանդարտվեց։ Նրանք ինձ ասացին, որ կարող են համաչափ ուժ կիրառել. ես հղի եմ և փոքրիկ երեխա ունեմ… Նպատակը հեռախոսս վերցնելն էր», — ասել է Բաջելիձեն:
Խուզարկության ավարտից հետո դատախազության աշխատակիցը նույնպես կարճ մեկնաբանություն է արել լրագրողներին. «Մենք քննչական գործողություն ենք իրականացրել դատարանի որոշման հիման վրա։ Հետաքննության շահերից ելնելով՝ այլ մանրամասներ չեմ կարող տրամադրել»:
Այսօր՝ ապրիլի 29-ի առավոտյան, քննչական ծառայության աշխատակիցները մտել են հեռուստահաղորդավար և «Նանուկայի հիմնադրամ»-ի հիմնադիր Նանուկա Ժորժոլիանիի, ակտիվիստ Մարիամ Բաջելիձեի և «Մարդու իրավունքների կենտրոն» ոչ կառավարական կազմակերպության ղեկավար Ալեկո Ցքիտիշվիլիի բնակարանները։
Դատախազությունն այս խուզարկության վերաբերյալ բացատրություն չի հրապարակել, սակայն «սաբոտաժ և թշնամական գործունեությանը օժանդակություն» որակմամբ հարուցված գործի շրջանակներում այս տարվա մարտի 17-ին, քննչական մարմնի պահանջով, հանկարծակի առգրավվել են այն հիմնադրամների և կազմակերպությունների հաշիվները, որոնք վճարում էին եվրոպամետ հանրահավաքների մասնակիցների տուգանքներն ու կարիքները։ Գործը հարուցվել է փետրվարին՝ «Միացյալ չեզոք Վրաստան» շարժման վերաքննիչ բողոքի հիման վրա։
«Միացյալ չեզոք Վրաստան»-ը հիմնադրվել է 2024 թվականի հուլիսի 10-ին և կրկնում է իշխող կուսակցության՝ «Վրացական երազանք»-ի ուղերձները։
Այս ՀԿ-ներին ու բարեգործական կազմակերպություններին մեղադրում են բողոքի ցույցերի համար սարքավորումներ գնելու և բողոքի ցույցերի ընթացքում ձերբակալվածների ընտանիքներին օգնություն ցուցաբերելու համար, ինչը նրանք որակել են որպես «անօրինական և հանցավոր գործողություններ կատարող անձանց խրախուսում»։
