Վրաստանի գլխավոր դատախազությունը մեղադրանք է առաջադրել վեց անձի՝ խոշոր չափի պետական միջոցների խմբակային խարդախությամբ յուրացման, նախապես խարդախությանն օժանդակելու և կեղծ պաշտոնական փաստաթղթեր պատրաստելու և օգտագործելու փաստերով։
Ըստ դատախազության՝ ընկերության սեփականատեր Բիճիկո Պաիկիձեին հեռակա մեղադրանք է առաջադրվել խոշոր չափի միջոցների խարդախությամբ յուրացման և կեղծ պաշտոնական փաստաթղթեր պատրաստելու և օգտագործելու համար, ինչը նախատեսում է 9 տարի ազատազրկում, իսկ մնացած անձանց՝ խոշոր չափի միջոցների խարդախությամբ յուրացման նախնական համաձայնության համար, որը նախատեսում է 6-ից 9 տարի ազատազրկում։
«Վրաստանի պետական անվտանգության ծառայության կոռուպցիայի դեմ պայքարի գործակալության անցկացրած հետաքննությունը պարզել է, որ 2021 թվականի հունիսից մինչև 2022 թվականի սեպտեմբերը, պետական մրցույթի իրականացման ընթացքում Օնիի մունիցիպալիտետի տարածքում Քութաիսի-Ալպանա-Մամիսոնի լեռնանցքի հատվածի և բնական աղետի հետևանքով վնասված որոշ հատվածների ափապաշտպան աշխատանքների իրականացման ժամանակ, բաժնետոմսերի սեփականատերը` նույն ընկերության տնօրենի և աշխատակցի, նաև մրցույթի իրականացման նկատմամբ վերահսկողություն իրականացնող ընկերության ղեկավարների օգնությամբ, նրանց հետ միասին, կեղծ պաշտոնական փաստաթղթեր կազմելով և օգտագործելով, խարդախությամբ յուրացրել է Վրաստանի տարածաշրջանային զարգացման և ենթակառուցվածքների նախարարությանը պատկանող 4 մլն 184 հազար 249 լարի գումար, ինչը պատճառել է մեծ վնաս և էականորեն խախտել պետության իրավական կարգավիճակը։ Ընկերության սեփականատիրոջը մեղադրանք է առաջադրվել Վրաստանի քրեական օրենսգրքի 180-րդ հոդվածի 3-րդ մասի ենթակետով և 362-րդ հոդվածի 2-րդ մասի ենթակետով (խոշոր գումարի խարդախությամբ յուրացում և կեղծ պաշտոնական փաստաթղթերի պատրաստում և օգտագործում, որը զգալի վնաս է պատճառել), որը որպես պատժի ձև և չափ նախատեսում է մինչև 9 տարի ազատազրկում։
Գլխավոր դատախազությունը օրենքով սահմանված ժամկետում կդիմի դատարան՝ մեղադրյալների նկատմամբ խափանման միջոց կիրառելու միջնորդությամբ»,- գրված է հաղորդագրության մեջ։
