Վրաստանի հանրային պաշտպանը (օմբուդսմեն) անդրադարձել է սեպտեմբերի 2-ին Ռուսթավելիի պողոտայում ձերբակալված քաղաքացիների ազատազրկմանը. նա ուշադրություն է հրավիրել ձերբակալման ընթացքում բողոքի ակցիայի մասնակիցների նկատմամբ ոստիկանության աշխատակիցների կոպիտ վերաբերմունքի և ուժի կիրառման վրա։
«Ոստիկանության գործողությունների ժամանակ կիրառվող ուժը պետք է լինի համաչափ և անհրաժեշտության դեպքում։ Հանրային պաշտպանը, լրացուցիչ ուսումնասիրությունից հետո, համապատասխանաբար կարձագանքի այս հարցին։
Նշենք, որ համապատասխան միջոցառումներ իրականացնելիս համաչափ ուժի կիրառման հարցը խնդրահարույց է նաև ընդհանուր դատարանների շենքերում, որտեղ դատական կատարածուները կարող են գերազանցել իրենց լիազորությունները քաղաքացիների նկատմամբ։ Գրասենյակն այս հարցին նույնպես կարձագանքի լրացուցիչ ուսումնասիրությունից և գնահատումից հետո՝ իր մանդատի շրջանակներում», — ասված է հայտարարության մեջ։
Հիշեցնենք. երեկ՝ սեպտեմբերի 2-ին, ոստիկանությունը Ռուսթավելիի պողոտայում վարչական կարգով ձերբակալել է 23 մարդու։ Բողոքի ակցիայի մասնակիցները երեկ հավաքվել էին Թբիլիսիում խորհրդարանի շենքի մոտ այն բանից հետո, երբ Թբիլիսիի քաղաքային դատարանում հրապարակվեցին դատավճիռներ, ըստ որոնց` ազատազրկման դատապարտվեցին եվրոպամետ բողոքի ակցիայի մի շարք մասնակիցներ։
Սեպտեմբերի 2-ի գիշերը Հանրային պաշտպանի ներկայացուցիչներն այցելել են Ռուսթավելիի պողոտայում վարչական կարգով կալանավորված 11 ակտիվիստի։ Հանրային պաշտպանը նշել է, որ ձերբակալվածներից մի քանիսի մարմնի վրա տեսանելի վնասվածքներ են եղել` այտուցվածություն, կարմրություն և կապտուկներ։
Ձերբակալվածներից մի քանիսը տեղափոխվել են Ախալցիխե, Գորի, Մցխեթա, Բակուրիանի և Խաշուրի, իսկ մի քանիսը սպասում են դատավճռին Թբիլիսիում՝ Զահեսեի և Դիղոմիի կալանավայրերում։
