«Վրացական երազանք»-ի կառավարության աշխատակազմի ղեկավար Լևան Ժորժոլիանին հանդիպել է Վրաստանում Գերմանիայի դեսպան Պիտեր Ֆիշերին։
Ըստ մամուլի ծառայության հաղորդման` հանդիպման ժամանակ «քննարկվել է Վրաստանի և Գերմանիայի միջև վերջին ժամանակներս ձևավորված հարաբերությունների դինամիկան»։
Մամուլի ծառայությունը հայտարարել է, որ Վրաստանի կառավարությունը գոհ չէ երկու երկրների միջև հարաբերությունների ներկա մակարդակից։
«Հանդիպման ժամանակ քննարկվել է երկու երկրների միջև հարաբերությունների վերջին դինամիկան. նշվել է, որ Վրաստանի կառավարությունը գոհ չէ երկու երկրների միջև հարաբերությունների ներկա մակարդակից և հույս ունի, որ իրավիճակը կփոխվի։
Կառավարության աշխատակազմի ղեկավարը նշել է, որ Վրաստանի կառավարությունը մեծ նշանակություն է տալիս գործընկեր երկրների հետ հարաբերություններին և հույս ունի, որ դիվանագիտական ներկայացուցիչների գործունեությունը կշարունակվի փոխադարձ հարգանքի վրա հիմնված համագործակցության սկզբունքներին համապատասխան։
Հանդիպման ժամանակ քննարկվել է նաև դրամաշնորհների մասին Վրաստանի օրենքը։ Գերմանիայի դեսպանը խնդրել է կառավարության աշխատակազմի ղեկավարին թույլատրել Վրաստանի կառավարությանը բացառություն անել վրացական ոչ կառավարական կազմակերպություններին գերմանական կազմակերպությունների հետ պայմանագրերի տրամադրման ուղղությամբ։
Լևան Ժորժոլիանին դեսպանին պատասխանել է, որ օրենքը հավասարապես վերաբերում է բոլորին, համապատասխանաբար` Վրաստանի կառավարությունը «խտրական մոտեցումներ չի հանդուրժի»։
Հիշեցնենք. վերջին ամիսների ընթացքում բազմաթիվ երկրներ, այդ թվում` ԵՄ-ն, ԱՄՆ-ն, Գերմանիան, խստորեն դատապարտել են «Վրացական երազանք»-ի ընդունած բռնաճնշողական օրենքները, ժողովրդավարական լուրջ հետընթացը և նշված պատճառներով դադարեցրել են համագործակցությունը Վրաստանի հետ և կոչ են արել չեղարկել մարդու իրավունքները սահմանափակող օրենքները և անցկացնել թափանցիկ ընտրություններ։
