Մոսկվան լուրջ է վերաբերվում Վրաստանի հետ հարաբերությունների կարգավորմանը, եթե նա չդառնա «գործիք» Ռուսաստանի դեմ խաղերում, «Ազատություն» ռադիոկայանի փոխանցմամբ ասել է Ռուսաստանի արտաքին գործերի նախարարության ԱՊՀ հարցերով չորրորդ դեպարտամենտի տնօրեն Միխայիլ Կալուգինը։
Դիվանագետի խոսքով՝ Մոսկվան ձգտում է «կայուն հարաբերությունների Թբիլիսիի հետ»։
«Թբիլիսին արտաքին գործերում ցուցաբերում է առողջ պրագմատիզմ և բազմավեկտորություն», — հավելել է Կալուգինը։
Մասնավորապես, նրա խոսքով, Վրաստանը «չի միացել հակառուսական պատժամիջոցների կոալիցիային և մերժել է Ռուսաստանի դեմ «երկրորդ ճակատ» բացելու անխոհեմ սցենարը, որը նրան պարտադրվում էր դրսից»։
«Դրա շնորհիվ մենք վերջին մի քանի տարիների ընթացքում շատ բանի ենք հասել տնտեսությունում։ Մենք դիվանագիտական հարաբերություններ չունենք, բայց ունենք ակտիվ կապեր, որոնք շոշափելի օգուտներ են բերում», — ասել է ռուս դիվանագետը։
Մինչև 2028 թվականը եվրաինտեգրումը կասեցնելու մասին Վրաստանի կառավարության հայտարարությունից հետո Ռուսաստանը հաճախ է գովաբանում Վրաստանի կառավարությանը և մեղադրում Բրյուսելին Թբիլիսիի նկատմամբ ճնշում գործադրելու համար։
