Վրաստանի Ներքին գործերի նախարարությունը (ՆԳՆ) պատրաստել է «Միջազգային պաշտպանության մասին օրենքում» օրենսդրական փոփոխությունների փաթեթ։
Գերատեսչությունից հայտնել են, որ նպատակը օտարերկրացու կամ քաղաքացիություն չունեցող անձի համար միջազգային պաշտպանության տրամադրման կարգավորումների կատարելագործումն է, նաև ապօրինի միգրացիայի դեմ պայքարը և ապաստանի տրամադրման ընթացակարգի չարաշահման կանխարգելումը։
Այս փաթեթը արդեն «Վրացական երազանք» կուսակցությունը ներկայացրել է խորհրդարանին։
Նախաձեռնության համաձայն՝
- Քրեական օրենսգրքում ներդրվում է պատժի նոր տեսակ՝ օտարերկրացու արտաքսում Վրաստանից և որոշակի ժամանակով մուտքի արգելք երկիր։
- Վարչական իրավախախտումների օրենսգրքում սահմանվում է վարչական պատժի նոր տեսակ՝ Վրաստանից օտարերկրացու արտաքսում և մուտքի արգելք։
Այլ փոփոխություններ՝
- Աճում են տուգանքները այն օտարերկրացիների համար, որոնք խախտել են Վրաստանի տարածքում գտնվելու կանոնները,
- Պարզեցվում է երկրում անօրինական գտնվող օտարերկրացիների արտաքսման ընթացակարգը,
- Ապաստանի ընթացակարգի չարաշահման կանխարգելման նպատակով՝
- Ներդրվում է նոր մեխանիզմ, ըստ որի՝ եթե օտարերկրացու մուտքը վտանգ է ներկայացնում պետության անվտանգության համար, ապաստանի հարցը կքննարկվի պետական սահմանին՝ առանց նրան երկիր թողնելու,
- Կրճատվում են ապաստանի քննության և բողոքարկման ժամկետները,
- Ներդրվում է որոշման փոխանցման պարզեցված (էլեկտրոնային) կարգ, ինչը կբարելավի բողոքարկման ժամկետների վերահսկումը,
- Կսահմանափակվի բնակության թույլտվության տրամադրումը այն օտարերկրացիներին, որոնց վերաբերյալ արդեն սկսվել է արտաքսման հարցի ուսումնասիրությունը կամ արդեն ընդունվել է արտաքսման որոշումը,
- Ներդրվում է արագացված ընթացակարգ այն օտարերկրացիների համար, որոնք մուտք գործելուց հետո մեկ ամսվա ընթացքում չեն դիմել ապաստանի համար։
