Վրաստանի դպրոցների ավարտական քննություններում այս տարի որոշ փոփոխություններ են նախատեսվում: Այս մասին հայտարարել է քննությունների և գնահատման ազգային կենտրոնի ղեկավար Մայա Միմինոշվիլին:
Վրաստանում դպրոցի ավարտական վկայական ստանալու համար աշակերտը ստիպված է հանձնել վրացերեն լեզվի, գրականության, աշխարհագրության, կենսաբանության, պատմության, ֆիզիկայի, մաթեմատիկայի և քիմիայի քննություններ:
Դպրոցական ավարտական քննությունները տեղի կունենան էլեկտրոնային տարբերակով: Նախկինում թեստն ավարտելուց անմիջապես հետո հավաքած միավորների մասին տեղեկատվությունը աշակերտի էկրանին էր հայտնվում: Այսուհետ այդ տեղեկատվությունն աշակերտների համար անհասանելի կլինի:
Միմինոշվիլիի պարզաբանմամբ, աշակերտները կիմանան միայն հաղթահարել են արդյոք անցողիկ միավոր՝ թե ոչ:
«Վերոնշյալ փոփոխությունն ուժի մեջ կմտնի այս տարի: Շատ շնորհակալ ենք Կրթության և գիտության նախարարությունից մեր առաջարկությունն ընդունելու համար: Այսուհետ աշակերտը քննությունն ավարտելուց հետո միայն կիմանա անցել է նվազագույն շեմը, թե ոչ»,- ասել է Միմինոշվիլին:
2017 թվականին Վրաստանի դպրոցներում ավարտական քննություններին մասնակցել է 40 հազար աշակերտ, որից 11 հազարը չի կարողացել հավաքել նվազագույն միավորը, որը թույլ կտար ունենալ ավարտական վկայական:
Փոխանցում է «www.newsgeorgia.ge»-ն:
