Վրաստանյան մոտ 30 լրատվամիջոցներ և ավելի քան 100 լրագրողներ դիմել են միջազգային հանրությանը, լրատվամիջոցների ներկայացուցիչներին և մամուլի ազատության պաշտպաններին։
Ըստ նրանց, Վրաստանում մեդիա միջավայրը վատթարանում է արագ տեմպերով, ուստի Մամուլի ազատության համաշխարհային օրվա առթիվ խնդրել են համերաշխություն և արդյունավետ արձագանք։
«Աշխարհի տարբեր մասերում մեդիա ընկերություններն ու լրագրողները օրեցօր ավելի ու ավելի են ենթարկվում ճնշման՝ ֆիզիկական հարձակումներ, բռնաճնշողական օրենսդրություն, քաղաքական դրդապատճառներով քրեական հետապնդումներ։ Այս մարտավարությունը, որը կիրառում են ավտորիտար ռեժիմները, միշտ օգտագործվել է լրատվամիջոցներին լռեցնելու և քննադատական կարծիքը ճնշելու համար, և այսօր Վրաստանում տեղի է ունենում աննախադեպ, լայնածավալ և սրընթաց հարձակում անկախ լրատվամիջոցների վրա», — գրել են դիմողները:
Նրանք նշել են «Վրացական երազանք»-ի կողմից վերջերս ընդունած մեդիամիջավայրի նկատմամբ հակաժողովրդավարական ու սահմանափակող օրենքների վատ ազդեցության և ցույցերի ընթացքում բռնության ենթարկված ու կալանավորված լրագրողների մասին:
«Ընդամենը մի քանի ամսվա ընթացքում Վրաստանի իշխող կուսակցությունը՝ օլիգարխ Բիձինա Իվանիշվիլիի գլխավորությամբ, ընդունել է մի շարք օրենքներ և օրենսդրական փոփոխություններ, որոնք սպառնում են անկախ լրատվամիջոցներին և քաղաքացիական հասարակությանը։ Մեզանից յուրաքանչյուրը կարող է քրեական պատասխանատվության ենթարկվել այս նոր օրենքների համաձայն, որոնք մեզ պիտակավորում են որպես «օտարերկրյա գործակալներ» պարզապես այն պատճառով, որ մեր կազմակերպությունները ֆինանսական աջակցություն են ստանում մամուլի ազատությունը սատարող միջազգային հիմնադրամներից, այդ թվում՝ նրանցից, ում հետ համագործակցում են աշխարհի շատ լրատվամիջոցներ և լրատվամիջոցների պաշտպանության կազմակերպություններ», — նշել են լրագրողներն ու մեդիա կազմակերպությունները։
