Վրաստանի ֆինանսների նախարարության քննչական ծառայությունը ձերբակալել է մեկ անձի՝ «Վրացական գազափոխադրման ընկերություն» ՍՊԸ-ին պատկանող գազատարից բնական գազի գողության գործով։

Այս տեղեկությունն այսօր կայացած ճեպազրույցի ժամանակ հայտնել է Քննչական ծառայության պետի տեղակալ Իա Ախալաիան։

Քննությունը պարզել է, որ մեղադրյալը տարիներ շարունակ Շիդա Քարթլիի շրջանում ունեցել է հացաբուլկեղենի խանութ, որտեղից տարածաշրջանի բնակչությանը մատակարարվել է արտադրված հացաբուլկեղենը։ Հացաբուլկեղենի խանութին հարակից տարածքում մեղադրյալն ունեցել է ժամանակավոր բենզալցակայան և ամեն օր տասնյակ մեքենաներ է լիցքավորել գազով։ Մեծ քանակությամբ նյութական օգուտ ստանալու և համապատասխան առևտրային գործունեության համար անհրաժեշտ ծախսերից խուսափելու նպատակով մեղադրյալը քննությանն անհայտ ժամանակ և հանգամանքներում անօրինական կերպով միացրել է «Վրացական գազափոխադրման ընկերություն» ՍՊԸ-ին պատկանող երկու գազատար խողովակները, որոնց միջոցով 2024-2025 թվականներին գաղտնի կերպով տիրացել է պետությանը պատկանող 4 միլիոն 347 հազար լարի արժողությամբ բնական գազի։

Հետաքննությունն ընթանում է Վրաստանի քրեական օրենսգրքի 177-րդ հոդվածի 4-րդ մասով, որը նախատեսում է 6-ից 10 տարի ազատազրկում: