Գերմանիային երախտագիտություն և դեսպան Պիտեր Ֆիշերին համերաշխություն հայտնելու նպատակով Վրաստանի քաղաքացիական և ակադեմիական հասարակությունը հանրագիր է նախաձեռնել։
Մինչ օրս հանրագիրը ստորագրել է 173 մարդ։
Հանրագիրն ստորագրողները կոչ են անում «Վրացական երազանք»-ին հետևել դիվանագիտական արարողակարգին, դադարեցնել օտարերկրյա դիվանագետների դեմ հարձակումները և ճանաչել Գերմանիայի ներդրումը երկրի զարգացման գործում։
«Մենք՝ Վրաստանի քաղաքացիական և ակադեմիական հասարակության ներկայացուցիչներս, մեծ մտահոգությամբ ենք հետևում Գերմանիայի դեսպան պարոն Պիտեր Ֆիշերի դեմ վերջերս սանձազերծած հրապարակային հարձակումներին։
Մենք լավ գիտենք, որ Գերմանիան աջակցում է մեր երկրին մի շարք կարևոր ոլորտներում՝ քաղաքական, տնտեսական և սոցիալական»,- գրել են հանրագրի կազմակերպիչները։
Նշենք, ավելի վաղ խորհրդարանի խոսնակ Շալվա Պապուաշվիլին ասել էր, որ Գերմանիայի դեսպանի աջակցությամբ «տիտուշկաները» հարձակվել են Թբիլիսիում «Վրացական երազանք»-ի Կախա Կալաձեի նախընտրական շտաբի վրա։
Հիշեցնենք. Գերմանիայի արտաքին գործերի նախարարությունը ևս հայտարարել էր, որ դատապարտում է Գերմանիայի դեսպանի հասցեին ուղղված «Վրացական երազանք»-ի ներկայացուցիչների ագրեսիվ հռետորաբանությունը։
