Վրաստանի դատախազությունը հետաքննություն է սկսել «Լելո»-ի հրապարակած աուդիոձայնագրության վերաբերյալ։

InterpressNews-ին գործակալությունից հայտնել են, որ հետաքննությունը սկսվել է Քրեական օրենսգրքի 162-րդ հոդվածով։

«Կկատարվեն բոլոր անհրաժեշտ քննչական և դատավարական գործողությունները։ Հետաքննության շրջանակներում կհարցաքննվի աուդիոձայնագրությունում հայտնված անձը», — InterpressNews-ին հայտնել են դատախազությունից։

Նշենք, «Լելո — Ուժեղ Վրաստան» կոալիցիան հրապարակել է աուդիոձայնագրություն, որը, նրանց խոսքով, հաստատում է կոալիցիայի մեծամասնական թեկնածուներից մեկի նկատմամբ ճնշման, բռնության, սպառնալիքի և կաշառման փորձը, «որի պատճառով էլ նա հանել է իր թեկնածությունը»։

Այսօր կայացած ճեպազրույցում «Լելո — Ուժեղ Վրաստան» կուսակցության և «Գախարիան Վրաստանի համար» կուսակցության համատեղ քաղաքապետի թեկնածու Իրակլի Կուպրաձեն ասել է, որ Կղիզիլաջլոյում «Լելո — Ուժեղ Վրաստան» կուսակցության մեծամասնական թեկնածուի նկատմամբ ճնշումը գործադրվել է Պետական ​​անվտանգության ծառայության և տեղական ոստիկանության աշխատակիցների ներգրավմամբ։