ԱՄՆ-ում Վրաստանի դեսպան Թամար Տալիաշվիլիին կանչել են ԱՄՆ Պետդեպարտամենտ և «խոր մտահոգություն» հայտնել կառավարության պաշտոնյաների հայտարարությունների վերաբերյալ, հաղորդել է «Ազատություն» ռադիոկայանը։
Հրապարակման համաձայն՝ Թամար Տալիաշվիլիի կանչը կապված է «Վրացական երազանք» կուսակցության կառավարության պաշտոնյաների ներկայացրած «հեղափոխությունը Թաիլանդից ֆինանսավորելու» մեղադրանքներին։
«Մենք խորապես մտահոգված ենք, որ Վրաստանի կառավարության բարձրաստիճան պաշտոնյաները անպատասխանատու կերպով տարածում են կեղծ տեղեկատվություն, ինչը հանգեցրել է հանրությանը հետապնդելու և վախեցնելու արշավի, որն ամբողջությամբ հիմնված է կեղծ տեղեկատվության վրա», — գրավոր պատասխանել է ԱՄՆ դեսպանատան խոսնակը «Ազատություն» ռադիոկայանի հարցին։
Հրապարակման համաձայն՝ դեսպանատան խոսնակը նշել է, որ Պետդեպարտամենտը կանչել է ԱՄՆ-ում Վրաստանի դեսպան Թամար Տալիաշվիլիին՝ «լուրջ առարկություն հայտնելու Վրաստանի կառավարության պաշտոնյաների հայտարարությունների նկատմամբ, որոնք ամրապնդում են լրատվամիջոցներում տարածված կեղծ տեղեկատվությունը, ինչը սխալ է բնութագրում ԱՄՆ կառավարության կատարած սովորական ֆինանսական փոխանցումները ԱՄՆ կառավարության նախկին աշխատակիցներին»։
«Վրացական երազանք» կուսակցության վարչապետ Իրակլի Կոբախիձեն արձագանքել է Տալիաշվիլիի կանչին Պետդեպարտամենտ՝ տեղեկությունն անվանելով «սուտ»։
Նրա խոսքով՝ Թամար Տալիաշվիլին «վերջին օրերին բազմաթիվ հանդիպումներ է ունեցել, բայց նրան ոչ մի անգամ չեն կանչել»։
