Վրաստանի նախկին վարչապետ Գիորգի Գախարիայի դեմ քրեական հետապնդում է սկսվել հունիսի 20-ի և Չորչանայի հսկիչ կետի գործերով։

Այս տեղեկությունը երեկ՝ նոյեմբերի 12-ին, ճեպազրույցի ժամանակ հայտնել է գլխավոր դատախազ Գիորգի Գվարակիձեն։

Գախարիան մեղադրվում է 2019 թվականի հունիսի 20-21-ին խորհրդարանի մոտ տեղի ունեցած բողոքի ցույցի ժամանակ երկուսից ավելի անձանց դիտավորյալ ծանր մարմնական վնասվածք հասցնելու և պետական ​​քաղաքական պաշտոն զբաղեցնելիս պաշտոնեական լիազորությունները չարաշահելու համար։

Մեղադրանքի երկրորդ դրվագով, ըստ Գիորգի Գվարակիձեի, հետաքննությունը պարզել է, «որ 2019 թվականի օգոստոսի 24-ին այդ ժամանակվա ներքին գործերի նախարար Գիորգի Գախարիան, որը նաև Ազգային անվտանգության խորհրդի քարտուղարն ու մշտական ​​անդամն էր, անտեսելով Ազգային անվտանգության խորհրդի լիազորությունները և առանց Վրաստանի վարչապետի հետ համաձայնեցնելու, նաև առանց Վրաստանի պետական ​​անվտանգության ծառայության հետ համաձայնեցնելու և առանց Եվրամիության մոնիթորինգային առաքելությանը տեղեկացնելու, միակողմանիորեն որոշում է կայացրել Չորչանա գյուղի մոտ գտնվող օկուպացիոն գծի երկայնքով լրացուցիչ ոստիկանական հսկիչ կետ տեղադրելու մասին»։

Գիորգի Գախարիային մեղադրանք է առաջադրվել Վրաստանի քրեական օրենսգրքի 25-րդ, 117-րդ հոդվածների 3-րդ մասի ենթակետով և 333-րդ հոդվածի 2-րդ մասով, որոնք որպես պատժի ձև և չափ են նախատեսում մինչև 13 տարի ազատազրկումը։