TV PIRVELI-ի փոխանցմամբ՝ Ախալքալաքի գյուղերից մեկի գյուղապետ Հովհաննես Գաբրիելյանին մեղադրում են 15-ամյա դեռահասի նկատմամբ բռնություն գործադրելու համար։ Երեխայի ընտանիքի անդամների խոսքով՝ գյուղապետը խմբակային կռվին մասնակցել է հինգ անձանց հետ միասին։

«Նա 5 անձանց հետ էր, որոնցից երեքը 50 տարեկանից մեծ էին։ Նրանք եկել էին իրենց Ford մեքենայով. ճանապարհին ում  հանդիպել են` բոլորին ծեծել են։ Տեսնելով, թե ինչպես են մարդկանց ծեծում, երեխան փորձել է փախչել… Գյուղապետը ճանապարհին բռնել է նրան, հրել մեքենայի մոտ և ծեծել։ Նա կոտրվածքներ չունի, կապտուկներ ունի, կողոսկրերը և գլուխը ցավում են։ Վեցն էլ նույն ընտանիքի անդամներ են, և սա առաջին անգամը չէ, որ նրանք հարձակվում և ծեծում են մարդկանց։ Յոթերորդ անգամն է», — TV Pirvel-ին պատմել է դեռահասի ընտանիքի անդամը։

Հովհաննես Գաբրիելյանը TV Pirveli-ի հարցմանն ի պատասխան հերքել է կատարվածը։ «Չգիտեմ՝ ինչի մասին եք խոսում, ես որևէ հարձակման չեմ մասնակցել. ինչի մասին դուք խոսում եք, բամբասանք է։ Հաստատում եմ, որ ոստիկանությունն իսկապես հարցաքննել է ինձ, բայց չգիտեմ՝ ինչ կապ ունեմ այդ բախման հետ», — ասել է գյուղապետը։

Միջադեպի վերաբերյալ հետաքննություն է սկսվել Քրեական օրենսգրքի 126-րդ հոդվածով` խմբակային բռնություն։

Հավելում — խմբ.

Տեղից «Ալիք Մեդիա Վրաստանի»-ին փոխանցել են, որ Հովհաննես Գաբրիելյանը տևական ժամանակ դատապարտված է ազատազրկման՝ կոռուպցիայի մեղադրանքով, իսկ վերոնշյալ դեպքը պատահել է մեկ ամիս առաջ Բեժանո գյուղում։ Աղբյուրի փոխանցմամբ՝ ծեծկռտուքը եղել է երիտասարդների միջև՝ աղջկան պաշտպանելու համար. երկու վիճող կողմի դեմ հարուցվել է քրեական գործ։