Տրանզիտային համարի տրամադրման վճարը կաճի մինչև 370 լարի: Այսօրվա դրությամբ վճարը 50 լարի է: Փոփոխությունների մասին օրենքի նախագիծն արդեն իսկ խորհրդարանում է։
«Ներքին գործերի նախարարության ծառայությունների գործակալության մատուցած ծառայությունների համար սահմանված վճարների և պայմանների մասին» Վրաստանի օրենքում կատարված փոփոխությունները նախատեսում են նաև գործակալության այլ ծառայությունների վճարների բարձրացում և նոր ծառայություններ ու վճարներ սահմանելու հնարավորություն։
Օրենքի նախագծի համաձայն՝ գործակալության առանձին ծառայությունների վճարների դրույքաչափերը ձևավորվում են նոր ձևով: Մասնավորապես՝ տրանզիտային համարի տրամադրման վճարը սահմանվել է 370 լարի։
Վրաստանի մաքսային տարածքից արտահանման կամ վերաարտահանման համար նախատեսված մեկ միավոր տրանսպորտային միջոցի կամ մեկ միավոր գյուղատնտեսական օժանդակ տեխնիկական միջոցների փորձաքննության համար համապատասխան ակտ կազմելու վճարը սահմանվել է 180 լարի՝ 100 լարիի փոխարեն։ Գործակալության կառուցվածքային ստորաբաժանման տարածքից դուրս նույն ստուգման համար համապատասխան ակտ կազմելու վճարը սահմանվել է 200 լարի՝ 130 լարիի փոխարեն։
Արտահանման կամ վերաարտահանման համար նախատեսված տրանսպորտային միջոցի մաքսային հայտարարագրի/գրանցման վկայականի լրացման և տվյալների փոխանցման վճարը սահմանվել է 200 լարի՝ 130 լարիի փոխարեն։
Օրենքի նախագիծը սահմանել է նոր ծառայություններ և վճարներ. մասնավորապես` Վրաստանի մաքսային տարածքից արտահանման կամ վերաարտահանման համար նախատեսված տրանսպորտային միջոցի տրանզիտային համարի տրամադրում՝ 150 լարի, տրանզիտային համարի տրամադրումը հաստատող փաստաթղթի տրամադրում՝ 20 լարի։
Օրենքի նախագծի պարզաբանման մեջ նշված է, որ Վրաստանում տրանսպորտային միջոցների չափը տարեկան միջինում աճում է 50-70 հազար տրանսպորտային միջոցով, և զգալիորեն աճել է նաև Գործակալության տարածքից դուրս գտնվող տրանսպորտային միջոցների ստուգման և փորձագիտական ստուգման պահանջը։
Հատկանշական է, որ 2023 թվականին իրականացվել է 100 հազար 27 միավոր վերաարտահանում և 16 հազար 182 միավոր արտահանում։
2024 թվականին վերաարտահանման տեմպն աճել է և կազմել 101 հազար 449, իսկ արտահանման ծավալը կազմել է 12 հազար 517 միավոր։
