V-Dem Institute-ի ժողովրդավարության զեկույցի համաձայն՝ Վրաստանում առկա է ժողովրդավարական հետընթաց, և երկիրը դասվում է «ընտրական ավտոկրատիայի» կատեգորիային:

«Վրաստանը զբաղեցնում է 101-րդ տեղը, և վատթարացում է նկատվում լիբերալ ժողովրդավարության ու ընտրական ժողովրդավարության ինդեքսներում: Նաև անկում է գրանցվել լիբերալ բաղադրիչի և մասնակցային բաղադրիչի ինդեքսներում:

Վրաստանի ժողովրդավարացման շրջանը՝ դատարանների անկախության, խոսքի ազատության և քաղաքացիական ազատությունների բարելավմամբ, շարունակվել է մինչև 2016 թվականը: Հետընթացը եղել է աստիճանական՝ մինչև 2024 թվականի ընտրական գործընթացը, որը ստվերվել է մեղադրանքներով, խախտումներով և մեդիային ու ընդդիմությանը լռեցնելու փորձերով: Մի քանի դիտորդ 2024 թվականի ընտրությունները գնահատել են «կեղծված» և ռուսական ազդեցությանը ենթարկված: 2024 թվականի ընտրությունների արդյունքները դեռևս վիճարկվում են: Խոր քաղաքական ճգնաժամն ակնհայտ է դարձնում պառակտումը իշխող «Վրացական երազանք» կուսակցության և ընդդիմության միջև: Ժողովրդավարության ցուցանիշները կտրուկ անկում են ապրել 2023-2025 թվականներին, ինչը Վրաստանը վերածել է ընտրական ավտոկրատիայի»,- ասված է զեկույցում:

2026 թվականի զեկույցի համաձայն՝ քաղաքացիական հասարակությունը գլոբալ առումով ենթարկվում է ուժեղ ճնշումների:

«Քաղաքացիական հասարակության կազմակերպությունների (ՔՀԿ) նկատմամբ բռնաճնշումները վատթարանում են 39 երկրում, մինչդեռ ՔՀԿ-ների հիմնադրման և լուծարման նկատմամբ վերահսկողությունն ավելի ու ավելի են ուժեղացնում կառավարությունները 37 երկրում: Օրինակ՝ Վրաստանի, Մալիի և Ռուսաստանի կառավարությունները (սրանք միայն մի քանիսն են) այժմ ավելի ու ավելի են օգտագործում սահմանափակող օրենքներ՝ իրավապաշտպանների և քաղաքացիական ակտիվիստների գործունեությունը սահմանափակելու, վերահսկելու կամ քրեականացնելու համար»,- նշված է զեկույցում:

Զեկույցում ուշադրություն է դարձվել նաև քննարկումների ազատությանը և Վրաստանում լրագրողների նկատմամբ հալածանքներին: