ՀՀ պաշտպանության նախարար Սուրեն Պապիկյանը պաշտոնական այցով գտնվում է Վրաստանում: Սուրեն Պապիկյանին հյուրընկալել է իր վրացի գործընկերը՝ Վրաստանի փոխվարչապետ, պաշտպանության նախարար Իրակլի Չիքովանին: Պաշտպանության նախարարության տարածքում պաշտոնական դիմավորման արարողությունից հետո նախարարներն ու պատվիրակության անդամները երկկողմ հանդիպում են ունեցել, որի ընթացքում քննարկել են պաշտպանության ոլորտում երկկողմ և տարածաշրջանային համագործակցության հարցեր: Իրակլի Չիքովանին շնորհակալություն է հայտնել հայկական կողմին մեր երկրի տարածքային ամբողջականության և ինքնիշխանության աջակցության համար և հաստատել Վրաստանի աջակցությունը Հայաստանի տարածքային ամբողջականության և ինքնիշխանության նկատմամբ:
Հանդիպման ժամանակ կողմերը կենտրոնացել են երկու երկրների միջև բարիդրացիական, սերտ կապերի և պաշտպանության ոլորտում երկկողմ համագործակցության դրական դինամիկայի վրա: Զրույցի հիմնական թեմաներից մեկը տարածաշրջանում առկա անվտանգության միջավայրն ու մարտահրավերներն էին: Վրաստանի և Հայաստանի պաշտպանության նախարարությունների ղեկավարները կրկին հայտնել են խաղաղությունն ապահովելու և ամրապնդելու իրենց պատրաստակամությունը:
Գործընկերները քննարկել են 2026 թվականի երկկողմ համագործակցության ծրագրում նախատեսված ուղղությունները, որն ավելի ընդգրկուն է, քան նախորդ տարիներին:
Հանդիպումից հետո ՀՀ պաշտպանության նախարարը Հերոսների հուշահամալիրում հարգանքի տուրք է մատուցել Վրաստանի տարածքային ամբողջականության համար մարտական գործողություններում զոհվածների հիշատակին։
Վրաստան այցի շրջանակներում Սուրեն Պապիկյանը կայցելի Ծերովանիում գտնվող Մարո Մակաշվիլիի անվան զինծառայողների վերականգնողական կենտրոն։
