Բիձինա Իվանիշվիլիի նախկին «անձնական ֆինանսիստ» Գիորգի Բաչիաշվիլին պնդում է, որ իրեն արտասահմանից առևանգել են իշխող «Վրացական երազանք» կուսակցության միլիարդատեր հիմնադիր Բիձինա Իվանիշվիլիի անունից, որի համար նա աշխատել է ավելի քան տասը տարի՝ կառավարելով նրա անձնական ֆինանսները:
Բաչիաշվիլին համապատասխան հայտարարությունն արել է Թբիլիսիի քաղաքային դատարանում կայացած նիստի ժամանակ։
«Շաբաթ օրը՝ մայիսի 24-ին, ինձ առևանգել են արտասահմանից: Ինձ կապել են, երկու օր շարունակ կապել են աչքերս, փաստաբանիս, դատախազին, դատավորին կամ ընտանիքիս չեն տեղեկացրել: Այնուհետև, առևանգելով` ինձ նստեցրել են Airzena (այժմ՝ Georgian Airways) ինքնաթիռ և անօրինական կերպով, խախտելով բոլոր օրենքները, տեղափոխել Վրաստան: Վրաստանի ներկայացուցիչները Բիձինա Իվանիշվիլիի անունից բռնի կերպով ինձ բերել են Վրաստան», — ասել է Բաչիաշվիլին։
Փաստաբանները պահանջում են, որ առևանգման գործով հետաքննություն սկսվի։
