Վրաստանի և Ֆրանսիայի միջև առանձնապես սերտ և բարեկամական հարաբերությունները ու փոխադարձ վստահության, հարգանքի և ընդհանուր եվրոպական արժեքների վրա հիմնված գործընկերությունը ողջունելի են։
Այս մասին հայտարարել է Վրաստանի վարչապետ Իրակլի Ղարիբաշվիլին Ֆրանսիայի դեսպանատան կողմից Ֆրանսիայի Ազգային տոնի կապակցությամբ կազմակերպված ընդունելության ժամանակ իր ելույթում։
Ղարիբաշվիլին շնորհավորել է Ֆրանսիայի դեսպանատան ներկայացուցիչներին և հրավիրված հյուրերին տոնի առթիվ ու նշել, որ Վրաստանն ու Ֆրանսիան բացառիկ սերտ և բարեկամական հարաբերություններ ունեն։
«Ինձ համար մեծ պատիվ է դիմել ձեզ բոլորիդ այս հատուկ և կարևոր տոնի կապակցությամբ՝ հուլիսի 14-ին, երբ նշվում է ազատությունը, հավասարությունը և Ֆրանսիայի միասնությունը:
Վրաստանը շատ հպարտ է, որ ունի երկարամյա վստահելի գործընկեր, ինչպիսին Ֆրանսիայի Հանրապետությունն է։ Մենք կիսում ենք ընդհանուր նպատակներ, որոնք կօգնեն մեզ կառուցել ավելի խաղաղ, ինքնիշխան և առաջադեմ Եվրոպա և պահպանել միջազգային կարգը՝ հիմնված կանոնների և արժեքների վրա:
Այս առանձնահատուկ օրն ուզում եմ ընդգծել, որ 2022 թվականի օգոստոսի 21-ին նշվելու է մեր երկու երկրների միջև դիվանագիտական հարաբերությունների հաստատման 30-ամյակը։ Հպարտությամբ ուզում եմ նշել, որ վերջին 30 տարիների ընթացքում Վրաստանը և Ֆրանսիան շատ սերտ և ջանասիրաբար համագործակցել են, ինչը շոշափելի և փոխշահավետ արդյունք է տվել տարբեր ոլորտներում»,- ասել է վարչապետը։
Ղարիբաշվիլին կարևորել է նաև վերջին տարիներին Ֆրանսիայի և Վրաստանի միջև առևտրային հարաբերությունների ակտիվացումը։
«Մեկ անգամ ևս շնորհավորում եմ և թույլ եմ տալիս հաստատել Վրաստանի կառավարության ամուր ցանկությունն ու վճռականությունը՝ շարունակելու սերտ համագործակցությունը Ֆրանսիայի հետ երկկողմ և բազմակողմ ձևաչափերում՝ մեր հարաբերություններն ամրապնդելու և խորացնելու նպատակով։ Կեցցե Ֆրանսիան: Կեցցե Վրաստանը»,- հավելել է Ղարիբաշվիլին։
