«Վրացական երազանք»-ի հիմնադիր, նախկին վարչապետ ու պատվավոր նախագահ Բիձինա Իվանիշվիլիի նախկին «անձնական ֆինանսիստ» և «կրիպտոարժույթի գործով» դատապարտված Գիորգի Բաչիաշվիլիին, որ նաև «Համաներդրումային հիմնադրամ»-ի նախկին ղեկավարն է, ձերբակալվել է։
Վրաստանի պետական անվտանգության ծառայության (ՊԱԾ) մայիսի 27-ի պաշտոնական հաղորդագրության համաձայն, «2025 թվականի մայիսի 26-ին ՊԱԾ-ը անանուն հաղորդագրություն է ստացել, ըստ որի պարզվել է, որ Վրաստանի և Ռուսաստանի Դաշնության երկքաղաքացիություն ունեցող, կարմիր շրջաբերականով հետախուզվող և դատապարտված Գիորգի Բաչիաշվիլին տեղաշարժվում է Կարմիր կամրջի և Սադախլոյի միջև գտնվող, այսպես կոչված, կանաչ սահմանի հատվածի մոտ»:
ՊԱԾ-ի տվյալներով, Բաչիաշվիլին ձերբակալվել է «հետաքննչական և օպերատիվ-հետախուզական միջոցառումների արդյունքում»։
Բաչիաշվիլին գաղտնի լքել էր Վրաստանը, և նրա գտնվելու վայրը անհայտ էր։
Իվանիշվիլիի հիմնադրած «Համաներդրումային հիմնադրամ»-ի նախկին ղեկավար Բաչիաշվիլիի դեմ գործը հարուցվել է 2023 թվականին՝ Իվանիշվիլիի հայտարարության հիման վրա։ Դատախազությունը Բաչիաշվիլիին մեղադրել է 39 մլն 215 հազար 820 դոլար կրիպտոարժույթի հափշտակության համար։ 2023 թվականի հուլիսի 6-ին Թբիլիսիի քաղաքային դատարանը նրա համար որպես խափանման միջոց ընտրեց 2,5 միլիոն լարի գրավ։
2025 թվականի մարտի սկզբին հայտնի դարձավ, որ Բաչիաշվիլին լքել է Վրաստանը։ Դատախազությունը Բաչիաշվիլիի նկատմամբ հետախուզում հայտարարեց։
2025 թվականի մարտի 10-ին Թբիլիսիի քաղաքային դատարանը Բաչիաշվիլիին հեռակա կարգով դատապարտեց 11 տարվա ազատազրկման «կրիպտոարժույթի գործով»։
Իվանիշվիլիի նախկին դաշնակիցը մեղավոր ճանաչվեց թե՛ «մեծ քանակությամբ գումարի հափշտակության», թե՛ «անօրինական եկամուտների օրինականացման» կամ փողերի լվացման համար։
Բաչիաշվիլիի դեմ հարուցվել է ևս երկու քրեական գործ՝ սահմանն անօրինական հատելու և «Մտկվարի» ՀԷԿ-ի նախագծի հետ կապված ծառայողական պարտականությունները չկատարելու համար «Համաներդրումային հիմնադրամ»-ի ղեկավարի պաշտոնավարման ընթացքում։
