Արդարադատության նախարարության որոշմամբ` կփոխվի կենսաչափական անձնագրերի դիզայնը։
Համապատասխան հրամանագրով արդեն սահմանվել են Վրաստանի քաղաքացու կենսաչափական անձնագրի, կենսաչափական դիվանագիտական անձնագրի և կենսաչափական ծառայողական անձնագրի, նաև Վրաստանում կարգավիճակ ունեցող և քաղաքացիության կարգավիճակ չունեցող անձի կենսաչափական ճանապարհորդական անձնագրի և փախստականի կենսաչափական ճանապարհորդական փաստաթղթի տեխնիկական բնութագրերը և ձևերը։
Արդարադատության նախարարի հրամանի համաձայն՝ նոր դիզայնի անձնագրերի տրամադրումը կսկսվի այս տարվա հունիսի 4-ից։ Այս ամսաթվից առաջ տրված անձնագրերը ուժի մեջ կմնան մինչև դրանց ժամկետի ավարտը։
Փաստաթղթում նշված է, որ անձնագրի ձևը պետք է լինի ստանդարտ գրքույկի ձևաչափով՝ կլորացված անկյուններով, և պետք է բաղկացած լինի նաև շապիկից, 2 ներքին էջից, 36 թղթե էջից և 1 երկէջանոց պոլիկարբոնատային էլեկտրոնային տվյալների էջից։ Հին դիզայնի անձնագիրը 48 էջ է։
Անձնագրի և ճանապարհորդական փաստաթղթի կառուցվածքը պետք է ապահովի փաստաթղթի ամրությունը և էլեկտրոնային բաղադրիչի անվտանգությունը ողջ կյանքի ցիկլի ընթացքում (10 տարի), դիմացկուն լինի ֆիզիկական և քիմիական քայքայման, նաև կեղծ փաստաթղթեր պատրաստելու համար անվտանգության հատկանիշների կրկնակի օգտագործման նկատմամբ։
Փաստաթղթում նաև նշված է, որ անձնագրի նոր ձևաչափը պետք է համապատասխանի միջազգային ստանդարտներին։
Վրաստանի քաղաքացու կենսաչափական անձնագրի արտաքին շապիկի գույնը պետք է լինի մուգ կարմիր, Վրաստանի քաղաքացու կենսաչափական դիվանագիտական անձնագրինը` մուգ կապույտ, Վրաստանի քաղաքացու կենսաչափական ծառայողական անձնագրինը՝ սև, Վրաստանում կարգավիճակ ունեցող և քաղաքացիություն չունեցող անձի կենսաչափական ճանապարհորդական անձնագրինը՝ բաց կապույտ, փախստականի կենսաչափական ճանապարհորդական փաստաթղթինը` կապույտ։
