Քութաիսիի Վերաքննիչ դատարանում Մզիա Ամաղլոբելիի դատական գործընթացը նշանակվել է հոկտեմբերի 28-ին։
Մզիա Ամաղլոբելիի փաստաբանները բողոքարկել են Բաթումիի քաղաքային դատարանի օգոստոսի 6-ին կայացրած դատավճիռը, որով Մզիա Ամաղլոբելին դատապարտվել էր 2 տարի ազատազրկման։
«Բողոքարկված դատավճիռն ապօրինի և անհիմն է, ծայրահեղ ձևական, որը բացարձակապես չի արտացոլում ոչ դատական նիստերում ապացույցների ուսումնասիրության արդյունքները, ոչ էլ արձագանքում է պաշտպանության կողմի որևէ առարկության և չի գնահատում պաշտպանության ներկայացրած ոչ մի ապացույց։ Բողոքարկված դատավճիռն ապացույց է այն բանի, որ Մզիա Ամաղլոբելիի նկատմամբ չի կիրառվել արդար դատաքննության սահմանադրական իրավունքը», – ասված է Վերաքննիչի բողոքարկման մեջ, որի տակ ստորագրել են Մզիա Ամաղլոբելիի փաստաբանները՝ իրավաբանական ընկերություն BLB-ի ավագ գործընկեր Մայա Ծմարիաշվիլին, Ջումբեր Քաթամաձեն և Ռաժդեն Խիմշիաշվիլին։
Փաստաբանների խոսքով՝ դատավոր Նինո Սախելաշվիլին նաև խախտել է դատավճիռը կողմերին տրամադրելու օրենքով սահմանված ժամկետը։
Օգոստոսի 6-ին Բաթումի քաղաքի դատարանի դատավոր Նինո Սախելաշվիլին Մզիա Ամաղլոբելիին դատապարտել է 2 տարի ազատազրկման Բաթումիի ոստիկանության պետ Իրակլի Դգեբուաձեին ապտակելու համար։ Մասնավորապես, Մզիա Ամաղլոբելիին դատախազությունը մեղադրում էր Քրեական օրենսգրքի 353¹-րդ հոդվածով նախատեսված հանցագործության համար, ինչը նախատեսում էր 4-ից 7 տարի ազատազրկում։ Դատավոր Նինո Սախելաշվիլին մեղադրանքը վերաորակավորեց ՔՕ-ի 353-րդ հոդվածի առաջին մասով։
