Սերբիան շնորհակալ է, որ Վրաստանը երեք տարի առաջ դեմ է քվեարկել Կոսովոյի անդամակցությանը Եվրոպայի Խորհրդին և հետևողականորեն աջակցել է Սերբիայի տարածքային ամբողջականությանը, X-ում գրել է Սերբիայի արտաքին գործերի նախարար Մարկո Ջուրիչը։ Նա հանդիպել է Մակա Բոճորիշվիլիին Քիշնևում ընթացող Եվրոպայի խորհրդի Նախարարների կոմիտեի 135-րդ նստաշրջանի շրջանակներում։
«Իմ երկրի համար այսօրվա լավ լուրի լույսի ներքո (Կոսովոն չդարձավ Եվրոպայի խորհրդի անդամ), մենք մեր անկեղծ երախտագիտությունն ենք հայտնում Վրաստանին երեք տարի առաջ Կոսովոյի անդամակցության ընթացակարգի մեկնարկի դեմ քվեարկելու, նաև Սերբիայի Հանրապետության տարածքային ամբողջականության և ինքնիշխանության հետևողական աջակցության համար։ Ես դա ևս մեկ անգամ վերահաստատեցի Վրաստանի արտաքին գործերի նախարարի հետ հանդիպման ժամանակ», — գրել է Ջուրիչը։
Նա ասել է, որ երկու երկրների միջև հարաբերությունները կայուն զարգանում են, ինչն արտացոլվել է ազատ առևտրի համաձայնագրի շուրջ բանակցությունների մեկնարկում։
«Թբիլիսիում Սերբիայի դեսպանատան բացման ընթացիկ գործընթացն ավելի է ընդգծում մեր վճռականությունը՝ ամրապնդելու Վրաստանի հետ համապարփակ հարաբերությունները։ Մենք գնահատում ենք մեր վրացի գործընկերների արագ և կառուցողական մոտեցումը այս նախաձեռնությանը», — ասել է Սերբիայի արտաքին գործերի նախարարը։
Վրաստանի արտաքին գործերի նախարարության հաղորդմամբ՝ հանդիպումը կենտրոնացած էր տնտեսական և առևտրային հարաբերությունների դինամիկայի վրա։ Ընդգծվել է նաև բարձր մակարդակի այցելությունների փոխանակման կարևորությունը. կողմերը քննարկել են տարածաշրջանում ստեղծված իրավիճակը և եվրոպական ինտեգրման ճանապարհին առկա մարտահրավերները։ Նախարարները «մեկ անգամ ևս հաստատել են Վրաստանի և Սերբիայի Հանրապետության ինքնիշխանության և տարածքային ամբողջականության փոխադարձ հարգանքը»։
Կոսովոն Եվրոպայի Խորհրդին անդամակցության դիմում էր ներկայացրել 2022 թվականի մայիսին։
