Վրաստանի տեխնիկական համալսարանը իշխանամետ «Ռուսթավի 2» և «Իմեդի» հեռուստաընկերություններից պահանջել է ներողություն խնդրել Թբիլիսիի պետական համալսարանի հետ միավորման ծրագրի վերաբերյալ իրենց ռեպորտաժների համար։
Պահանջը կապված է այս լրատվամիջոցների փետրվարի 3-ին տարածած այն գնահատականի հետ, ըստ որի` «համալսարանում կրթական ներկայիս պայմանները անբավարար են, իսկ ենթակառուցվածքները չեն համապատասխանում ակադեմիական չափանիշներին»։
Ըստ Վրաստանի տեխնիկական համալսարանի՝ «ռեպորտաժները կանխամտածված վարկաբեկիչ են և հասարակական կարծիքը մանիպուլացնելու փորձ` հատկապես վերջերս լրատվամիջոցներում Վրաստանի տեխնիկական համալսարանի և Թբիլիսիի պետական համալսարանի հնարավոր միավորման մասին լուսաբանման լույսի ներքո»։
«Ռեպորտաժներում օգտագործված տեսանյութը չի արտացոլում լսարանների, լաբորատորիաների կամ այլ սենյակների իրական վիճակը։ Չնայած դրան, տրված գնահատականները հակառակ եզրակացությունների են հանգում, ինչը լսարանին մոլորեցնելու փորձ է», — նշել է համալսարանը։
