Վրաստանի նախագահ Գիորգի Մարգվելաշվիլին չի ողջունում ինքնակառավարում ունեցող քաղաքների շուրջ Սահմանադրության նոր նախագծում տեղ գտած փոփոխությունները։
Այս մասին տեղեկացրել է նախագահի մամուլի խոսնակ Էկա Միշվելաձեն՝ պարզաբանելով, որ երկրի ղեկավարը կարծում է, որ այդ փոփոխությունները կխոչընդոտեն շրջանների տնտեսական զարգացմանը:
Հիշեցնենք՝ իշխանությունները մտադիր են ինքնակառավարում ունեցող 12 քաղաքներից 7-ին զրկել ինքնակառավարումից:
«Նախագահի կարծիքով, ինքնակառավարվող քաղաքների հետ կապված փոփոխությունները հակասում են եվրոպական կառավարման համակարգին, խանգարում համայնքների համահավասար զարգացմանը: Առանց ինքնակառավարման անհնար է պատկերացնել ժողովրդավարական քաղաքական համակարգ, պետություն ու քաղաքացիական հասարակություն»,- հայտարարել է Միշվելաձեն:
Իշխանություններն այս քայլը բացատրում են ֆինանսական ծախսերը կրճատելու անհրաժեշտությամբ։
