Սեպտեմբերի 7-8-ը Հյուսիսատլանտյան դաշինքի գլխավոր քարտուղար Յան Ստոլտենբերգը կայցելի Վրաստան: Այս մասին կառավարության նիստի ժամանակ հայտարարել է Վրաստանի արտգործնախարար Միխեիլ Ջանելիձեն:
Վերջինիս խոսքով, սա Հյուսիսատլանտյան խորհրդի թվով 4-րդ այցն է Վրաստան, ինչը ցույց է տալիս Վրաստանի նկատմամբ դաշինքի աննախադեպ աջակցութունն ու գործընկերական սերտ հարաբերությունները:
«Այցի ընթացքում կգնահատվեն Վրաստանում իրականացված բարեփոխումները, ինչպես պաշտպանական ունակությունների բարձրացման, այնպես էլ ժողովրդավարության և տնտեսական զարգացման ոլորտներում: Այցի շրջանակներում կքննարկենք նաև Վարշավայի գագաթնաժողովում ձեռք բերված որոշումները»,-ասել է Ջանելիձեն` ընդգծելով որ վարշավյան գագաթնաժողովը եվս մեկ անգամ հաստատեց Վրաստանի եվրաատլանտյան ձգտումները:
Արտաքին գերատեսչության ղեկավարը հիշեցրել է, որ այդ ժամանակ ընդգծվեց նաև ժողովրդավարական բարեփոխումների, պաշտպանական ու տնտեսական զարգացման հարցերում Վրաստանի գրանցած առաջընթացը:
«Կսահմանվեն նաև համագործակցության գործնական քայլեր, որպեսզի Վրաստանի պաշտպանունակությունը ավելի բարձրանա և Վրաստանի Հյուսիսատլանտյան դաշինքի ինտեգրման գործընթացն ավելի արագա ընթանա»,- հայտատարելէ Ջանելիձեն:
Ջանելիձեի խոսքով, Վրաստանն այսօր տիրապետում է բոլոր այն գործնական մեխանիզմներին, որոնք անհրաժեշտ են ՆԱՏՕ-ին անդամակցելու համար:
