Կովկասի բնապահպանական հասարակական կազմակերպությունների ցանցի (CENN) շրջակա միջավայրի պաշտպանության ծրագրերի համակարգող Ռեզո Գեթիաշվիլիի գնահատմամբ, Բորժոմիում տեղի ունեցած բնական աղետի արդյունքի պատճառը միայն առատ տեղումները չեն: «Allnews»-ը մեջբերում է Գեթիաշվիլիի խոսքերը, որ այս ամենը «90-ականներին Բորջոմիիում տեղի ունեցած զանգվածային ծառահատումների արդյունք էր»:
Կովկասի բնապահպանական ՀԿ-ի ցանցի ներկայացուցիչը առանձնացրել է նաև ածխահանքերի հայթհայթման փաստը, որի արդյունքում ևս այսօր ծառահատումներ են տեղի ունենում: Դրանք ապօրինի համարելով, Գեթիաշվիլին նկատում է, որ իրականում գոյություն չունի այնքան ծառ, որ հնարավոր լինի օրենքով հատել:
«Անձրեւը սովորական երեւույթ է եւ դրանից այսպիսի հետևանքներ չպիտի լինեն: Ծառերն ավերված են, դրանք այլևս չեն կատարում իրենց գործառույթը՝ այսինքն հողի պաշտպանությունը: Այսպիսի բան կարող է լինել ինչպես գյուղում, այնպես էլ քաղաքում: Այնպիսի տարածքներում, որտեղ ջուր է հավաքվում, ծառերը ստանձնում են ջուրը կառավարելու և հողը պաշտպանելու գործառույթը»,-ասել է բնապահպանը` ցավով արձանագրելով, որ ոչ միայն Բորջոմիիում, այլև ողջ Վրաստանի տարածքում, այնտեղ, որտեղ ծառերը պակասել են, հորդառատ անձրևները աղետալի հետևանքներ են ունենալու:
Հիշեցնենք, որ օգոստոսի 4-ի երեկոյան Բորջոմիիում մոտ կես ժամ անդադար տեղացած հորդառատ անձրևի ու կարկուտի հետևանքով մի շարք խնդիրներ են առաջացել: Վնասվել են տներ, առևտրի կետեր, անջատվել է էլեկտրահաղորդակցությունը, մեծ վնաս է կրել Բորջոմիի զբոսայգին: Հորդառատ անձրևը խնդիրներ է առաջացրել նաև Բորջոմի քաղաքի կայարանում, որտեղ ուժեղ անձրևից մի քանի ծառ է տապալվել:
Սկսվել է զբոսաշրջային գոտիներում մարդկանց տարհանումը: Փրկարար ծառայությունը տեղեկացրել է, որ Բորջոմիից 2 կմ հեռավորության վրա գտնվող ծծմբային բաղնիքից 20 մարդ է տարհանվել:
Շրջանի ղեկավար Դիմիտրի Կիպիանիի ղեկավարությամբ արտակարգ շտաբ է ստեղծվել, մոբիլիզացվել են հրշեջ և փրկարար ծառայությունները, ոստիկանությունը:
Արտակարգ շտաբը պաշտոնապես հայտարարել է, որ իրավիճակն այս պահին վերահսկելի է, խուճապի պատճառ չկա: Աղետից մարդիկ չեն տուժել և այս պահին վնասները միայն նյութական են: Արդեն վերականգնված է Բորջոմիում աղետի արդյունքում վնասված ճանապարհային տեղաշարժը, նաեւ բնակիչների մեծ մասի կայուն էլեկտրաէներգիան: Այս մասին «interpressnews»-ին փոխանցել են Վրաստանի Տարածաշրջանային զարգացման եւ ենթակառուցվածքների նախարարությունից:
Տեղեկացնենք, որ Բորջոմիում է գտնվում նաեւ տարածաշրջանային զարգացման եւ ենթակառուցվածքների նախարար Նոդար Ջավախիշվիլին:
