«Գալիս է ժողովրդի գարունը» խորագրով բողոքի 124-րդ ակցիայի ժամանակ Վրաստանի 5-րդ նախագահ Սալոմե Զուրաբիշվիլին դիմեց հավաքվածներին:
Ողջունելով Ռուսթավելիի պողոտայում հավաքված ցուցարարներին` նա այսօրվա ցույցը կապեց Վրաստանի անկախության համար 1991 թվականին անցկացված հանրաքվեի հետ: Տեղում աշխատում է «Ալիք Մեդիա»-ի նկարահանող խումբը:
«Ուղիղ 34 տարի առաջ դրվեց վրացական ժամանակակից, անկախ պետության հիմքը։ 1991 թվականի մարտի 31-ին վրացի ընտրողները հետ վերցրին իրենց երկիրը, քվեարկեցին անկախության օգտին, քվեարկեցին ռուսական օկուպացիան ընդմիշտ դադարեցնելու օգտին։ Խորհրդային և ռուսական 70 տարվա ստրկությունից հետո անկախության վերականգնումը ոչ հեշտ էր, ոչ էլ հեշտությամբ վստահելի հանրության շրջանում: Անգամ այն ժամանակ անվստահությունը, հուսահատությունը, երկակիությունը, կոնֆորմիզմը և սեփական շահը խոչընդոտեցին ազատագրման ճանապարհը և մթագնեցին հաղթանակի ճանապարհը»:
Զուրաբիշվիլին նշեց` բայց նույնիսկ այն ժամանակ կային մարտիկներ, որ հավատում էին Վրաստանի ապագային և ազատության անխուսափելիությանը, և նրանք հասան այն ամենին, ինչը շատերն անհնար էին համարում.
«Նրանք կարողացան խաղաղ ճանապարհով դիմել այդ դժվարին քայլին։ Քաջությամբ և հավատքով։ Ո՞վ կպատկերացներ, որ Վրաստանը կհաղթի այնպիսի մեծամասնությամբ, այնպիսի միասնությամբ, որ դրանով կարտահայտի իր սեփական կամքը։ Երևի անհավատներ կային նաև այն ժամանակ, որ ասում էին, թե Ռուսաստանը երբեք չի զիջի, թե ռեժիմը երբեք չի զիջելու, բայց ստիպեցին զիջել: Այս հաղթանակը հեշտ չէր…
Այսօր էլ այս խաղաղ բանակը կանգնած է Ռուսթավելիի պողոտայում և մեր քաղաքների փողոցներում, կանգնած է և դիմադրում է անարդարությանը, բռնությանը, ստրկությանը, նվաճմանը, կանգնած է ագրեսորների դիմաց, հորդառատ անձրևի տակ և նույն վճռականությամբ մերժում է օտար երկրի իշխանությունը, օտար ռեժիմը»։
Զուրաբիշվիլին դիմեց ցուցարարներին. «Արդեն 124 օր է՝ դուք այստեղ կանգնած պահանջում եք վերադարձնել այն, ինչ մեզ է պատկանում ժողովրդի կամքով, օրենքով և Սահմանադրությամբ. մեր անսասան ընտրությունը՝ անկախությունը, ազատությունը և եվրոպական ապագան»։
Վերջում Զուրաբիշվիլին հանդես եկավ նախաձեռնությամբ` ստեղծել «դիմադրության հարթակ».
«Ես առաջարկել եմ և այսօր հրապարակայնորեն հայտարարում եմ` պետք է ստեղծել դիմադրության հարթակ եվրոպամետ քաղաքական սպեկտրի մասնակցությամբ։ Այս հարթակի հիմնական սկզբունքն այն է, որ բաց է բոլոր եվրոպամետ կուսակցությունների և խմբերի համար, որոնք պատրաստ են մի կողմ դնել քաղաքական անհամատեղելիությունները և իրագործել բողոքի երկու նպատակները՝ նշանակել նոր, արդար ընտրություններ և ազատ արձակել քաղբանտարկյալներին»:
