«Վրացական երազանք»-ի կառավարության վարչապետ, կուսակցության նախագահ Իրակլի Կոբախիձեն հայտարարել է, որ ԱՄՆ Ներկայացուցիչների պալատի կողմից MEGOBARI Act-ի ընդունումը «կոնկրետ այս դեպքում խորքային պետության» (Deep State) հաղթանակն էր Դոնալդ Թրամփի վարչակազմի նկատմամբ, չնայած «պայքարը շարունակվում է»։
Մայիսի 7-ին կուսակցության համագումարից հետո լրագրողների հետ զրույցում Իրակլի Կոբախիձեն Կոնգրեսի ստորին պալատի ընդունած օրենքն անվանել է «թշնամական արարք» և ասել. «Թրամփի և Deep State-ի միջև պայքարը շարունակվում է։ Երբ նման որոշում է կայացվում, դա նշանակում է, որ այդ կոնկրետ պահին Deep State-ը հաղթել է Թրամփի վարչակազմին։ Մենք սա տեսանք մի քանի օր առաջ»։
Լրագրողների պարզաբանող հարցին ի պատասխան՝ Կոբախիձեն ասել է. «Մենք սկզբից մեկ բան ենք հայտարարել և կարող ենք դա ասել նաև հիմա՝ մենք դեռևս լավատեսական սպասումներ ունենք, որ Թրամփի վարչակազմը կհաղթի Deep State-ին։ Այդ դեպքում Վրաստանի և Միացյալ Նահանգների միջև հարաբերությունները կբարելավվեն»։
Լրագրողների այն դիտարկումներին, որ MEGOBARI Act-ը պաշտպանել են Հանրապետական կուսակցության մի շարք անդամներ, Կոբախիձեն պատասխանել է. «Նրանք գտնվում են Deep State-ի ազդեցության տակ։ Մարդիկ կան, որ չեն գտնվում նախագահ Թրամփի ազդեցության տակ, այլ գտնվում են Deep State-ի ազդեցության տակ։ Օրինակ՝ Ջո Ուիլսոնը խորքային պետության մարդն է»։
Կոբախիձեն նաև ասել է, որ «պատժամիջոցները կոմպլիմենտ են»։
- Մայիսի 6-ին ԱՄՆ Կոնգրեսի ստորին պալատը՝ Ներկայացուցիչների պալատը, երկկուսակցական աջակցությամբ քվեարկեց և ընդունեց MEGOBARI Act-ը։ Օրենքն ընդունելու համար բավարար էր 218 ձայն, սակայն փաստաթղթին կողմ էր արտահայտվել 349 կոնգրեսական, իսկ դեմ՝ 42-ը։ Սա 80 տոկոս աջակցություն է։
- Ներկայացուցիչների պալատից հետո հերթը Կոնգրեսի վերին պալատինը՝ Սենատինն է. նախքան օրինագիծը նախագահ Դոնալդ Թրամփի ստորագրությանը հասնի, Սենատը նույնպես պետք է հաստատի։ Սենատն արդեն գրանցել է օրինագիծը:
- Deep State տերմինը հատկապես արդիականություն ձեռք բերեց արևմտյան համատեքստում, այն բանից հետո, երբ Դոնալդ Թրամփը 2016 թվականին առաջին անգամ ընտրվեց Միացյալ Նահանգների նախագահ։
- Այս տերմինը հիշատակում են նաև «Վրացական երազանք»-ի առաջնորդները, որոնք 2022 թվականից հետո մշակել են դավադրության տեսություն «գլոբալ պատերազմի կուսակցության» մասին, իսկ Դոնալդ Թրամփի երդմնակալության մոտենալուն պես նրանք «գլոբալ պատերազմի կուսակցությունը» փոխարինեցին Deep State տերմինով, որը, ըստ վերլուծաբանների, ավելի հասկանալի արտահայտություն է ԱՄՆ 47-րդ նախագահի համար։
Ավելի վաղ՝ մարտի 28-ին, «Վրացական երազանք»-ի խորհրդարանական իրավական հարցերի հանձնաժողովի նախագահ Արչիլ Գորդուլաձեն ԱՄՆ Սենատի արտաքին հարաբերությունների հանձնաժողովի կողմից MEGOBARI Act-ի ընդունումից հետո հայտարարել էր, որ նախագահ Դոնալդ Թրամփի «պայքարը Deep State-ի դեմ արդյունավետ չէ»։
«Վրացական երազանք» կուսակցության պատգամավոր Լևան Մախաշվիլին, որը նաև վիճահարույց խորհրդարանի եվրոպական ինտեգրման հանձնաժողովի նախագահն է, հույս ունի, որ ԱՄՆ նախագահ Դոնալդ Թրամփը չի ստորագրի MEGOBARI Act-ը:
- «Վրացական երազանք»-ի կառավարությունը, որի հետ ԱՄՆ-ն դադարեցրել է իր ռազմավարական գործընկերությունը 2024 թվականին, հույսեր էր կապում Թրամփի 2025 թվականի հունվարի 20-ի երդմնակալության հետ՝ պնդելով, որ դրանից հետո իրավիճակը կփոխվի։
- Ավելի ուշ «Վրացական երազանք»-ի առաջնորդները հայտարարություններ արեցին, որոնք, վերլուծաբանների կարծիքով, ապահովագրեցին Թրամփի օրոք ԱՄՆ-ի կրիտիկական դիրքը պահպանելու ռիսկերը։
«Վրացական երազանք»-ի դավադրության տեսության համաձայն, «գլոբալ պատերազմի կուսակցությունը», որի նպատակն է 10 անգամ կրճատել աշխարհի բնակչությանը, վերահսկում է ԱՄՆ-ի և ԵՄ քաղաքական իստեբլիշմենթը և տարիներ շարունակ պայքարում է «Վրացական երազանք»-ի հիմնադիր ու պատվավոր նախագահ Բիձինա Իվանիշվիլիի դեմ, որը «վերջ է դրել գործակալապետությանը»։
Նույն դավադրության տեսության համաձայն, «գլոբալ պատերազմի կուսակցությունն» է հրահրել 2008 թվականի Ռուսաստանի ներխուժումը Վրաստան, իսկ նրանց «խամաճիկներն են» Վրաստանի 3-րդ նախագահ Միխեիլ Սաակաշվիլին, Ուկրաինայի նախագահ Վլադիմիր Զելենսկին, Վրաստանի 5-րդ նախագահ Սալոմե Զուրաբիշվիլին, վրաստանյան ընդդիմադիր կուսակցությունները, ՀԿ-ները, լրատվամիջոցները, Եվրախորհրդարանը, Եվրամիությունը, ԱՄՆ քաղաքական ղեկավարությունը և այլն։
