Վրաստանում Գերմանիայի դեսպան Պետեր Ֆիշերը դիմել է «Իմեդի» հեռուստաընկերությանը և առաջարկել է ապացուցել, որ ինքը հրահանգներ է տալիս արմատական ընդդիմությանը։
«Վրաստանը ցանկանում է դառնալ Եվրամիության անդամ, բայց միաժամանակ խստորեն քննադատում է Եվրամիությանը և տարածում կեղծ տեղեկատվություն, ես կասեի` ապատեղեկատվություն։ Լավ միտք չէ Եվրամիության մասին այդպես խոսել, եթե ուզում ես միանալ այդ կազմակերպությանը։
Ես հարց ունեմ «Իմեդի» հեռուստաընկերությանը։ Ինչո՞ւ «Իմեդի»-ն երեկ ասաց, որ ես հրահանգներ եմ տալիս արմատական ընդդիմադիրներին։
Ինչի՞ հիման վրա եք տարածել այս տեղեկությունը: Քանի որ այս տեղեկությունը կեղծ է, առաջարկում եմ, որ «Իմեդի» հեռուստաընկերությունը ապացուցի, որ ես հրահանգներ եմ տալիս արմատական ընդդիմությանը», — ասել է Ֆիշերը։
Նշենք, որ լրագրող Մզիա Ամաղլոբելիի գործով Բաթումիի քաղաքային դատարանում են գտնվում Գերմանիայի դեսպան Պետեր Ֆիշերը, Շվեդիայի դեսպան Աննա Լիբերգը և Էստոնիայի դեսպան Մարդիասլու Կահարին։
Եվրախորհրդարանի անդամ Լենա Շիլինգը նույնպես մասնակցում է այսօրվա դատական նիստին։
