Չեխիայում Վրաստանի նախկին դեսպան Թեա Մաիսուրաձեն իր Facebook-յան էջում հրապարակված գրառմամբ արձագանքել է Զուրաբ Պոլոլիկաշվիլիի՝ ՄԱԿ-ի Համաշխարհային զբոսաշրջային կազմակերպության (UNWTO) գլխավոր քարտուղարի պաշտոնի համար քվեարկությունից դուրս թողնելուն։
Մաիսուրաձեն գրել է. «Ռեժիմն անընդունելի է համարում յուրաքանչյուրին, ով սպասարկում է Վրաստանի ազգային շահերը, այլ ոչ թե Ռուսաստանի շահերը»։
Նախկինում Զուրաբ Պոլոլիկաշվիլին ենթադրել էր, որ «Վրացական երազանք»-ի առաջնորդների դժգոհությունն իր նկատմամբ, որը կուսակցությունը մանրամասն չի քննարկել և միայն ակնարկել է, կապված է Չեխիայում նախկին դեսպան Թեա Մաիսուրաձեի հետ։
Վրաստանյան «Ազատություն» ռադիոկայանը գրել է, որ մի քանի ամիս առաջ Պոլոլիկաշվիլիի թիմում սկսել է աշխատել Չեխիայում Վրաստանի նախկին դեսպան Թեա Մաիսուրաձեն, որը դիվանագիտական ծառայությունից հեռացել է 2024 թվականի դեկտեմբերին՝ Վրաստանի կողմից եվրաինտեգրման գործընթացի կասեցման և Թբիլիսիում եվրոպամետ, հակակառավարական ցույցերի մասնակիցների նկատմամբ զանգվածային բռնության շրջանում։
Մայիսի 15-ին «Ֆորմուլա» հեռուստաընկերությանը տված հարցազրույցում Զուրաբ Պոլոլիկաշվիլին մասնավորապես խոսել է Թեա Մաիսուրաձեի գործոնի մասին և ասել, որ «Վրացական երազանք»-ի առաջնորդները համառորեն պահանջում են Մաիսուրաձեի հեռացումը։
