Թբիլիսիի քաղաքային դատարանի դատավոր Իրակլի Շվանգիրաձեն «Կոալիցիա փոփոխությունների համար»-ի անդամ Զուրաբ Ջափարիձեի նկատմամբ որպես խափանման միջոց կիրառված 20 հազար լարի գրավը փոխարինեց կալանքով։ Նրան ձերբակալեցին հենց դատարանի դահլիճում։
Այսօր՝ մայիսի 22-ին, դատական նիստում դատավորը քննարկեց մեղադրողի միջնորդությունը՝ գրավը կալանքով փոխարինելու վերաբերյալ։
Զուրաբ Ջափարիձեն մեղադրվում է «Վրացական երազանք»-ի ստեղծած ժամանակավոր քննչական հանձնաժողովի պահանջը չկատարելու համար։ Ապրիլի 16-ին դատավոր Նանա Շամատավան այդ առիթով Ջափարիձեի նկատմամբ սահմանել էր 20 հազար լարի գրավ. Ջափարիձեն հրաժարվել էր վճարել։
Նրան մեղադրանք է առաջադրվել Քրեական օրենսգրքի 349-րդ հոդվածով` Վրաստանի խորհրդարանի ժամանակավոր քննչական հանձնաժողովի պահանջը չկատարելը։ Սա պատժվում է տուգանքով կամ մինչև մեկ տարի ազատազրկմամբ։
Նշենք. այսօր Թբիլիսիի քաղաքային դատարանի մոտ նիստից առաջ և դատավարության ընթացքում մեծ թվով ոստիկաններ էին մոբիլիզացված։
Ցուցարարներին թույլ չի տրվել մտնել դատարանի բակ, իսկ տեսախցիկներով լրագրողներին արգելվել է մասնակցել դատական նիստին։
Սկսվել է Զուրաբ Ջափարիձեի դատական նիստը. մոբիլիզացված են մեծ թվով ոստիկաններ
