Amnesty International միջազգային իրավապաշտպան կազմակերպությունը կոչ է արել «Վրացական երազանք»-ին անհապաղ չեղյալ հայտարարել ոչ կառավարական կազմակերպություններից տեղեկատվություն պահանջող հրամանագիրը և քաղաքացիական հասարակության անկախությունը սահմանափակող օրենսդրությունը։
Amnesty International-ի Արևելյան Եվրոպայի և Կենտրոնական Ասիայի փոխտնօրեն Դենիս Կրիվոշեևը արձագանքել է այն լուրերին, որ վրացական դատարանը հինգ անկախ ՀԿ-ներին պարտավորեցրել է կոռուպցիայի դեմ պայքարի բյուրոյին փոխանցել իրենց պաշտպանած շահառուների մասին զգայուն տեղեկություններ, այդ թվում՝ նրանց գործունեության և դրամաշնորհների վերաբերյալ տվյալներ։
«Այս հրամանագիրը ևս մեկ օրինակ է այն բանի, թե ինչպես են խստացվում խոսքի և միավորումների ազատության դեմ ճնշումները Վրաստանում», — ասել է Կրիվոշեևը:
Նա ասել է, որ ՀԿ-ներից զգայուն տեղեկատվություն, այդ թվում՝ շահառուների անունները, լուսանկարները, բանկային և առողջապահական տվյալները, հանձնելու պահանջը սահմանափակում է այդ կազմակերպությունների անկախությունն ու ինքնավարությունը և պետությանն անհամաչափ վերահսկողության հնարավորություն է տալիս նրանց գործունեության նկատմամբ։
