Սեպտեմբերի 24-ին Եվրոպայի խորհրդում Եվրամիության (ԵՄ) պատվիրակությունը հայտարարություն է տարածել Վրաստանում մարդու իրավունքների իրավիճակի վերաբերյալ։ Ըստ հայտարարության` ԵՄ պատվիրակությունը մտահոգված է Վրաստանում մարդու իրավունքների իրավիճակով և ժողովրդավարության շարունակական նահանջով։
Հայտարարությունը վերաբերում է քաղբանտարկյալներին, այդ թվում՝ ընդդիմության ձերբակալված առաջնորդներին։ ԵՄ պատվիրակությունը նաև նշել է, որ Վրաստանում խաղաղ ցուցարարների նկատմամբ բռնություն է կիրառվել։
«Վրաստանի իշխանությունները պետք է հարգեն հավաքների և միավորումների ազատության, նաև խոսքի ազատության իրավունքները, հետաքննեն իրավապահ մարմինների կիրառած անհամաչափ ուժի բոլոր մեղադրանքները և պատասխանատվության ենթարկեն պատասխանատուներին։ Մենք վերահաստատում ենք դատական համակարգի անկախությունը պաշտպանելու և արդար դատաքննության իրավունքն ապահովելու անհրաժեշտությունը։
Մենք կոչ ենք անում Վրաստանի իշխանություններին չեղարկել անկախ քաղաքացիական յոթ հասարակական կազմակերպությունների բանկային հաշիվները սառեցնելու որոշումը։ Մենք նաև կոչ ենք անում Վրաստանի իշխանություններին իրականացնել Վենետիկի հանձնաժողովի բոլոր առաջարկությունները։
Մենք ցավում ենք, որ Տարածաշրջանային և տեղական իշխանությունների կոնգրեսը հրավեր չի ստացել Վրաստանից՝ դիտարկելու առաջիկա ընտրությունները, և ԵԱՀԿ/ԺՀՄԻԳ-ի մոնիթորինգային առաքելությունը ժամանակին չի ստացել հրավերը։ Մենք ընդգծում ենք ԵՄ-ի պատրաստակամությունը՝ աջակցելու վրաց ժողովրդի եվրոպական ձգտումներին և երկրի անդամակցության ուղուն, եթե Վրաստանի իշխանությունները փոխեն իրենց ներկայիս գործողությունները», — ասված է ԵՄ պատվիրակության հայտարարության մեջ։
ԵՄ պատվիրակության հայտարարությանը միացել են նաև Ալբանիան, Անդորրան, Իսլանդիան, Լիխտենշտեյնը, Մոլդովան, Մոնակոն, Չեռնոգորիան, Հյուսիսային Մակեդոնիան, Սան Մարինոն, Ուկրաինան և Միացյալ Թագավորությունը։
