Միխեիլ Սաակաշվիլիի, Գիորգի Վաշաձեի, Նիկա Գվարամիայի, Նիկա Մելիայի, Զուրաբ Ջափարիձեի, Էլենե Խոշտարիայի, Մամուկա Խազարաձեի և Բադրի Ջափարիձեի դեմ հարուցվել են քրեական գործեր դիվերսիայի, օտարերկրյա պետության դեմ թշնամական գործողություններին օժանդակելու և դրդելու, Վրաստանի սահմանադրական կարգի և ազգային անվտանգության հիմքերի դեմ ուղղված գործողությունները ֆինանսավորելու, նաև Վրաստանի սահմանադրական կարգը բռնի կերպով փոխելու կամ պետական իշխանությունը տապալելու կոչ անելու մեղադրանքներով։
Այս հայտարարությունն արել է «Վրացական երազանք»-ի գլխավոր դատախազ Գիորգի Գվարակիձեն։
«Վրաստանում գործող որոշ ընդդիմադիր կուսակցությունների առաջնորդներ՝ Էլենե Խոշտարիան, Զուրաբ Ջափարիձեն և Գիորգի Վաշաձեն, Վրաստանի պետական շահերին վնաս հասցնելու և պատժամիջոցներ կիրառելու համար արհեստական հիմք ստեղծելու նպատակով, օտարերկրյա պետություններին տեղեկություն են տրամադրել Վրաստան նավթամթերքի ներմուծման, նաև վրացական ռազմական ոլորտում առկա կամ հորինված իրավիճակի մասին։ Նրանք տարածել են կեղծ տեղեկություններ այն մասին, որ Վրաստանի օդային տարածքն օգտագործվում է իրանական ռազմական անօդաչու թռչող սարքեր Ռուսաստանի Դաշնություն մատակարարելու համար։
Էլենե Խոշտարիան, Զուրաբ Ջափարիձեն և Գիորգի Վաշաձեն պարբերաբար նաև տեղեկություն և փաստաթղթային նյութեր են տրամադրել, այդ թվում՝ Ռուսաստանի Դաշնությունում աշխատող պետական ծառայողների ցուցակներ։
Նրանք տեղեկություն են տրամադրել օտարերկրյա պետությունների ներկայացուցիչներին, որի հետևանքով մի շարք երկրներ պատժամիջոցներ են կիրառել ընդհանուր առմամբ առնվազն երեք հարյուր վրացի քաղաքացիների նկատմամբ, այդ թվում՝ քաղաքական պաշտոնյաների, պետական ծառայողների և անհատ գործարարների», — հայտնել է դատախազությունը։
