Վրաստանի քաղաքացիություն ստանալու գործընթացը, հատկապես օտարերկրացիների համար, ունի որոշակի պահանջներ, այդ թվում՝ քննություն հանձնելը: Այս գործընթացը կարգավորվում է «Վրաստանի քաղաքացիության մասին» օրենքով։

Քաղաքացիություն ստանալու համար քննություն է պահանջվում։

Ընդհանուր կարգով քաղաքացիություն ստանալու համար դիմորդը պետք է ապրի Վրաստանի տարածքում օրինական վերջին 10 տարվա ընթացքում։ Նաև պահանջվում է.

• Վրացերենի իմացություն. պետք է տիրապետել վրացերենին այն ծավալով, որը բավարար է պետական մարմիններում, նաև առօրյա կյանքում հաղորդակցվելու համար։ Սա սովորաբար գնահատվում է որպես B1 կամ B2 մակարդակի իմացություն։

• Վրաստանի պատմության հիմնական դրույթների իմացություն. պետք է տեղյակ լինել երկրի պատմության հիմնական փուլերին և կարևոր իրադարձություններին։

• Վրաստանի օրենքի (Սահմանադրության) հիմնական դրույթների իմացություն. պետք է տեղյակ լինել Վրաստանի Սահմանադրության և մարդու հիմնարար իրավունքների ու ազատությունների վերաբերյալ հիմնական սկզբունքներին։

Քննությունը սովորաբար անցկացվում է գրավոր և բանավոր ձևաչափերով և ուղղված է գնահատելու դիմորդի ինտեգրումը վրաց հասարակությանը։

Հիմնական պահանջները (ընդհանուր կարգ)

Այս թեմայով «Ալիք Մեդիա Վրաստան»-ը զրուցել է Մառնեուլիի շրջանի Դամիա գյուղի հանրակրթական դպրոցի տարրական դասարանների ուսուցչուհիներից մեկի՝ Աննա Դարբինյանի հետ։

Նա նույնպես Վրաստանի քաղաքացիություն է ստացել վերոնշյալ քննությունը հանձնելուց հետո և պատմեց իր փորձի մասին։ Ուսուցչուհին Հայաստանից է, պատմեց, որ երկար ժամանակ որևէ երկրում բնակվելու ընթացքում ինքնաբերաբար բխում է քաղաքացիություն ստանալու անհրաժեշտությունը։ Նրա խոսքով՝ հենց այդ գիտակցված միտքն էլ դարձել է իր կայացրած որոշման հիմնական պատճառը։

«Կարծում եմ, երբ բնակվում ես որևէ երկրում, այդ երկրի քաղաքացիություն ունենալը խիստ անհրաժեշտություն է։ Հենց այս միտքն էլ դարձել է նման որոշում կայացնելու պատճառը։

Ինձ համար որոշակի դժվարություն էին ներկայացնում Վրաստանի պատմության թեստերը, որովհետև մեծամասամբ անծանոթ դեպքերի մասին էին, իսկ մյուս հարցերով որևէ դժվարություն չկար, — ասաց Դարբինյանը։ 

Քաղաքացիություն ստանալու ճանապարհը, ըստ մեր զրուցակցի, բաղկացած է մի քանի հաջորդական փուլերից. նախ՝ քննության համար գրանցումն ու պատրաստվելու գործընթացն է, այնուհետև՝ քննության անցկացումը։ Քննությունը հաջողությամբ հանձնելուց հետո սկսվել է նոր փուլ՝ անհրաժեշտ փաստաթղթերի հավաքում, քաղաքացիության դիմումի լրացում և հանձնում։ Դրան հաջորդել է հարցազրույցը, որի ավարտից հետո, նրա խոսքով, սկսվել է անորոշ սպասման շրջան։ Տեղեկությունը վերջնական որոշման մասին քաղաքացին ստանում է հաղորդագրությամբ։

Ուսուցչուհին ընդգծեց, որ պատրաստվելիս ակտիվ աշխատել է թեստերով, որպեսզի որևէ հարց անպատասխան չմնա։ Նրա փորձով՝ դիմումների պատասխանները սովորաբար ստացվում են մոտ 80 օրվա ընթացքում։

«Քաղաքացիություն ստանալ ցանկացողներին խորհուրդ կտամ չվախենալ։ Դժվար բան չկա»,- ասաց նա։

Լրացուցիչ մանրամասներ

Բացի քննությունից, դիմորդը պետք է ունենա.

• Մշտական բնակություն. բնակվի Վրաստանում օրենքով սահմանված կարգով առնվազն 10 տարի (քաղաքացիության համար դիմելու պահից առաջ)։

• Աշխատանք կամ գույք՝ ունենա աշխատանք Վրաստանում կամ անշարժ գույք, կամ ձեռնարկատիրական գործունեություն Վրաստանի տարածքում, կամ բաժնետոմսեր վրացական ձեռնարկությունում (նվազագույն ապրուստի միջոցներ ապահովող):

 Քաղաքացիություն ստանալը պարզեցված կարգով (ամուսնության հիմքով)

Եթե դիմորդը ամուսնացած է Վրաստանի քաղաքացու հետ և ապրել է Վրաստանում 5 տարի, նա կարող է դիմել պարզեցված կարգով։

• Պահանջվում է քննություն. այս կարգով դիմելիս ևս պահանջվում է վրացերենի, պատմության և օրենքի հիմնական դրույթների իմացության քննություն։

Նշենք. ըստ տվյալների` 2024 թվականին Վրաստանի քաղաքացիություն է շնորհվել 3587 անձի, որոնց մեծ մասը Ռուսաստանից (2361), Գերմանիայից (251) և Ուկրաինայից (175) էին, ինչը 476-ով ավելի է 2023 թվականից։ 2024 թվականին Վրաստանի քաղաքացիություն է ստացել Հայաստանի Հանրապետության 131 քաղաքացի։ Նույն ժամանակահատվածում 1592 անձ կորցրել է քաղաքացիությունը` հիմնականում Ռուսաստանի քաղաքացիություն ստանալու պատճառով (802 դեպք)։