«Վրացական երազանք»-ի որոշմամբ՝ իրավաբանական օգնության ծառայությունը հաշվետու կլինի ոչ թե խորհրդարանին, այլ վարչապետին։
Այս առաջարկի հեղինակները «Վրացական երազանք»-ի պատգամավորներն են:
Ըստ գործող օրենսդրության՝ Իրավաբանական օգնության ծառայությունը հանրային իրավունքի իրավաբանական անձ է, որի գործունեությունն անկախ է, ապահովում է իրավաբանական խորհրդատվության և իրավաբանական օգնության հասանելիությունը։ Ծառայությունը չի ենթարկվում որևէ պետական մարմնի և հաշվետու է միայն Վրաստանի խորհրդարանին։
«Վրացական երազանք»-ի խորհրդարանում գրանցված օրենքի նախագծի համաձայն՝
- Իրավաբանական օգնության ծառայությունը հաշվետու կլինի Վրաստանի վարչապետին, իսկ ծառայության տնօրենը Վրաստանի վարչապետին կներկայացնի ծառայության նախորդ տարվա գործունեության մասին հաշվետվություն։
- Վերակազմակերպվելու են իրավաբանական օգնության խորհրդի կազմավորման և ծառայության տնօրենի նշանակման ու ազատման կանոնները։ Ինն անդամի փոխարեն Խորհուրդը կունենա յոթ անդամ, որոնցից 2-ը կլինեն Վրաստանի խորհրդարանի իրավական հարցերի և մարդու իրավունքների պաշտպանության ու քաղաքացիական ինտեգրման հանձնաժողովների նախագահները, 1-ը՝ Արդարադատության բարձրագույն խորհրդի քարտուղարը, 1-ը՝ Վրաստանի գլխավոր դատախազը, 1-ը՝ Վրաստանի կառավարության աշխատակազմի ղեկավարը, 1-ը՝ Վրաստանի հանրային պաշտպանը և 1-ը՝ Վրաստանի փաստաբանների ասոցիացիայի նախագահը։
- Խորհրդի անդամների պաշտոնավարման ժամկետը կորոշվի նրանց համապատասխան պաշտոններում աշխատելու ժամկետով։
Ծառայության տնօրեն նշանակելու լիազորությունը պատկանում է Վրաստանի վարչապետին, որին Խորհուրդը կներկայացնի Ծառայության տնօրենի պաշտոնի թեկնածու նշանակման համար։ Նրան պաշտոնից ազատումը կկատարի Վրաստանի վարչապետը՝ համաձայն «Հանրային իրավունքի իրավաբանական անձանց մասին» Վրաստանի օրենքի։ Պարզաբանման մեջ նշված է, որ օրենքի նախագծի ընդունման արդյունքում իրավաբանական ծառայության տնօրենին վճարվող 3 ամսվա աշխատավարձի չափով փոխհատուցումը կենթարկվի եկամտային հարկի։
