Պետական հաստատությունները և մի շարք մասնավոր կազմակերպություններ պարտավոր կլինեն իրենց կայքերն ու բջջային հավելվածները հասանելի դարձնել հաշմանդամություն ունեցող անձանց:
Նշվածները նման պարտավորություն կստանձնեն 2027 թվականից։ Սա արձանագրված է «Հաշմանդամություն ունեցող անձանց իրավունքների մասին» օրենքում նախատեսված փոփոխություններով, որոնք խորհրդարանն ընդունել է առաջին ընթերցմամբ։
Նախագիծը մշակել են «Վրացական երազանք»-ի պատգամավորները, ըստ որի՝ օրենքն ուղղակիորեն սահմանում է, որ վարչական մարմինները և մասնավոր որոշ կազմակերպություններ պարտավոր են իրենց կայքերն ու բջջային հավելվածները հասանելի դարձնել հաշմանդամություն ունեցող անձանց։
Օրենքի նախագիծը սահմանել է մասնավոր կազմակերպությունների ցանկը և նշել այն կազմակերպությունները, որոնք գործում են կրթության, առողջապահության, սոցիալական ապահովության, տրանսպորտի, կոմունալ ծառայությունների, բանկային գործունեության, փոստային ծառայությունների, ապահովագրության, նաև դեղագործական ու սննդամթերքի վաճառքի ոլորտներում։
Օրենքի նախագծը կտարածվի օրինակ, տեղական շուկայում գործող այնպիսի կայքերի վրա, ինչպիսիք են Biletebi.ge-ն, tkt.ge-ն, Jobs.Ge-ն, myhome.ge-ն։
Օրենքի նախագծի համաձայն՝ կայքի և բջջային հավելվածի հարմարեցման պարտավորությունը չի տարածվի աուդիովիզուալ մեդիա ծառայություններ մատուցողների և հեռարձակումների լիազորություն ունեցող անձանց վրա։
Կառավարությունը տեխնիկական կանոնակարգերի միջոցով կսահմանի կայքերի և բջջային հավելվածների հասանելիության չափանիշները, նաև կորոշի կայքերում և բջջային հավելվածներում այն նյութերը, որոնց վրա չի տարածվում վերոնշյալ կանոնակարգը։
Նախագծի հեղինակը Մարդու իրավունքների կոմիտեի նախագահ Ռատի Իոնատամիշվիլին է։
